பிற்படுத்தப்பட்டோர் நலத்துறை விடுதிகளில் சேர மாணவ-மாணவிகள் விண்ணப்பிக்கலாம்

விருதுநகர் மாவட்டத்தில் பிற்படுத்தப்பட்டோர், மிகவும் பிற்படுத்தப் பட்டோர் மாணவர் மற்றும் மாணவிகள் விடுதிகளில் சேர விண்ணப்பிக்கலாம் என மாவட்ட நிர்வாகம் தெரிவித்துள்ளது.

இது குறித்து மாவட்ட நிர்வாகம் தெரிவித்துள்ளதாவது:-

மாணவர் விடுதிகள்

விருதுநகர் மாவட்டத்தில் பிற்படுத்தப்பட்டோர், மிகவும் பிற்படுத்தப்பட்டோர் நலத்துறை சார்பில் மாணவ-மாணவிகளுக்கு மொத்தம் 47 விடுதிகள் செயல்பட்டு வருகின்றன. இதில் மாணவர்களுக்கான பள்ளி விடுதிகள் 26-ம், மாணவிகளுக்கான பள்ளி விடுதிகள் 19-ம் கல்லூரி மாணவர்களுக்கான விடுதிகள் 2-ம் செயல்பட்டு வருகின்றன. பள்ளி விடுதிகளில் 4-ம் வகுப்பு முதல் 12-ம் வகுப்பு வரை படிக்கின்ற மாணவ-மாணவிகளும், கல்லூரி விடுதிகளில் பட்டப்படிப்பு, பட்ட மேற்படிப்பு மற்றும் பாலிடெக்னிக் படிக்கும் மாணவ- மாணவிகளும் சேர தகுதி உடையவர்கள் ஆவர்.

பிற்படுத்தப்பட்டோர், மிகவும் பிற்படுத்தப்பட்டோர், சீர்மரபினர் மாணவர் விடுதிகளில் அனைத்து வகுப்பைச் சார்ந்த மாணவர்களும் குறிப்பிட்ட விகிதாசார அடிப்படையில் சேர்த்துக் கொள்ளப்படுகின்றனர்.

சலுகைகள்

விடுதிகளில் எவ்வித செலவினமும் இல்லாமல் சலுகைகள் இலவசமாக வழங்கப்படுகின்றன. அனைத்து மாணவ-மாணவியருக்கும் உணவும், தங்கும் வசதியும் வழங்கப்படும். 10-ம் வகுப்பு வரை படிக்கும் மாணவ- மாணவியருக்கு 4 இலவச சீருடைகள் வழங்கப்படும்.

10-ம் வகுப்பு மற்றும் பிளஸ்-2 படிக்கும் மாணவ-மாணவியருக்கு சிறப்பு வழிகாட்டிகள் வழங்கப்படும்.

தகுதிகள்

விடுதிகளில் சேர பெற்றோர், பாதுகாவலர் ஆண்டு வருமானம் ரூ.2 லட்சத்துக்கு மிகாமல் இருக்க வேண்டும். இருப்பிடத்தில் இருந்து படிக்கும் கல்வி நிலையத்தின் தூரம் குறைந்தபட்சம் 8 கிலோ மீட்டர் இருக்க வேண்டும். மாணவிகளுக்கு இது பொருந்தாது. விண்ணப்பங்களை சம்பந்தப்பட்ட விடுதி காப்பாளரிடம் அல்லது மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகத்தில் இருந்து இலவசமாக பெற்றுக் கொள்ளலாம். மாவட்ட பிற்படுத்தப்பட்டோர் மற்றும் சிறுபான்மையினர் அலுவலகத்தில் வருகிற 23-ந்தேதிக்குள்ளும் கல்லூரி விடுதிக்கான விண்ணப்பங்கள் ஜூலை 15-ந்தேதிக்குள்ளும் சமர்ப்பிக்கப்பட வேண்டும்.

சாதி மற்றும் பெற்றோர் ஆண்டு வருமானச்சான்றிதழ்களை விடுதியில் சேரும்போது வழங்க வேண்டும். தமிழ்நாட்டில் உள்ள ஒவ்வொரு விடுதிகளிலும் இலங்கை தமிழர்களின் குழந்தைகளுக்கு 5 இடங்கள் ஒதுக்கப்பட்டுள்ளது. எனவே மாணவ-மாணவிகள் அரசின் சலுகைகளை பெற்று பயனடையலாம்.

இவ்வாறு மாவட்ட நிர்வாகம் தெரிவித்துள்ளது.