நெல்லையில் திடீர் மழை

நெல்லையில் கடந்த சில தினங்களாக வெயிலின் தாக்கம் அதிகமாக இருந்தது. இந்த நிலையில் கடந்த இரண்டு நாட்களுக்கு முன்பு மேற்கு தொடர்ச்சி மலை பகுதியில் பரவலாக மழை பெய்தது. இருந்தாலும் மாவட்டம் முழுவதும் வெயிலின் தாக்கம் அதிகமாக இருந்தது.

நெல்லையில் நேற்று காலை முதல் மாலை 4 மணி வரை வெயில் கொளுத்தி வாங்கியது. 4 மணிக்கு வானம் கருத்து மேகமூட்டத்துடன் காணப்பட்டது. அப்போது திடீரென மழை பெய்ய தொடங்கியது. நெல்லை சந்திப்பு, வண்ணார்பேட்டை, பாளையங்கோட்டை பகுதியில் சுமார் அரை மணி நேரம் பரவலாக மழை பெய்தது. இதனால் மழைநீர் ஆங்காங்கே குளம் போல் தேங்கி கிடந்தது.

இதையொட்டி பாளையங்கோட்டை பகுதியில் நேற்று மாலையில் ஒரு மணி நேரத்துக்கும் மேலாக மின்சாரம் தடைபட்டிருந்தது. இதனால் பொதுமக்கள் பெரும் அவதிக்கு உள்ளானார்கள். நெல்லை சந்திப்பு, டவுன் பகுதிகளில் லேசாக மழை தூறிக் கொண்டே இருந்தது.