வெவ்வேறு சம்பவங்களில் 2 தொழிலாளிகள் தற்கொலை

திருப்பூர் விஜயாபுரம் காந்திரோட்டை சேர்ந்தவர் ஆறுமுகம். அவருடைய மகன் சத்தியசீலன் (வயது 30). கூலித்தொழிலாளி. உடல்நலக்குறைவால் அவதிப்பட்ட இவர், பழனி அருகே தாழையூத்தில் உள்ள மாமனார் வீட்டில் தங்கியிருந்து சிகிச்சை பெற்று வந்்தார். இந்தநிலையில் ஆஸ்பத்திரியில் சிகிச்சை பெற்றும் நோய் குணமாகவில்லை என்று கூறப்படுகிறது. இதனால் மனம் உடைந்த சத்தியசீலன், விஷ மாத்திரைகளை தின்று உயிருக்கு போராடினார். அக்கம்பக்கத்தினர் அவரை மீட்டு சிகிச்சைக்காக பழனி அரசு ஆஸ்பத்திரிக்கு கொண்டு சென்றனர். ஆனால் வழியிலேயே சத்தியசீலன் பரிதாபமாக இறந்தார். இதுகுறித்து சாமிநாதபுரம் போலீசார் வழக்குப்பதிவு செய்து விசாரணை நடத்தி வருகின்றனர். தற்கொலை செய்த சத்தியசீலனுக்கு சரண்யா (25) என்ற மனைவியும், ஒரு மகளும் இருப்பது குறிப்பிடத்தக்கது.

திண்டுக்கல் பாரதிபுரம் பகுதியை சேர்ந்த சீனிவாசன் மகன் ராஜூ (வயது 33). கூலித்தொழிலாளி. கடந்த சில நாட்களாக இவர், உடல்நலம் பாதிக்கப்பட்டு இருந்ததாக தெரிகிறது. இதனால் விரக்தியில் இருந்த அவர், நேற்று வீட்டில் தூக்குப்போட்டு தற்கொலை செய்து கொண்டதாக கூறப்படுகிறது. இதுகுறித்து திண்டுக்கல் தெற்கு போலீசார் வழக்குப்பதிவு செய்து விசாரித்து வருகின்றனர்.