புத்தாண்டு கொண்டாட்டத்தின்போதுபொது அமைதிக்கு குந்தகம் விளைவித்தால் கடும் நடவடிக்கைவிழுப்புரம் மாவட்ட போலீஸ் சூப்பிரண்டு ஸ்ரீநாதா எச்சரிக்கை

1,200 போலீசார் பாதுகாப்பு

விழுப்புரம் மாவட்டத்தில் புத்தாண்டு தினத்தை முன்னிட்டு பொதுமக்கள் பாதுகாப்பாகவும், அமைதியான முறையிலும் புத்தாண்டை கொண்டாட மாவட்ட காவல்துறை அறிவுறுத்தியுள்ளது. அதே நேரத்தில் சில கட்டுப்பாடுகளையும் விதித்துள்ளது. இதுகுறித்து மாவட்ட போலீஸ் சூப்பிரண்டு ஸ்ரீநாதா கூறியதாவது:-

விழுப்புரம் மாவட்டத்தில் புத்தாண்டையொட்டி ஏதேனும் அசம்பாவித சம்பவங்கள் நடைபெறாமல் தடுக்கும் வகையில் மாவட்டம் முழுவதும் 1,200 போலீசார் பாதுகாப்பு பணியில் ஈடுபடுத்தப்பட உள்ளனர். புத்தாண்டையொட்டி இன்று (சனிக்கிழமை) மாலை முதல் மாவட்டம் முழுவதும் தீவிர வாகன சோதனை மேற்கொள்ளப்பட உள்ளது. நள்ளிரவுக்கு பிறகு மோட்டார் வாகனங்களில் தேவையின்றி சுற்றக்கூடாது.

கட்டுப்பாடுகள்

நள்ளிரவு 1 மணிக்கு மேல் பொது இடங்களில் புத்தாண்டு குதூகல கொண்டாட்டங்கள் இருக்கக்கூடாது. முதல்நாள் இரவும், புத்தாண்டின்போதும் கடற்கரைகளில் பொதுமக்கள், கடல்நீரில் இறங்கி கொண்டாட்டங்களில் ஈடுபட அனுமதிக்கப்பட மாட்டாது. மது அருந்தி வாகனம் ஓட்டினால் அவர்களின் வாகனங்கள் பறிமுதல் செய்து உரிய நடவடிக்கை எடுக்கப்படும். எக்காரணத்தை கொண்டும் அதிவேகமாகவும், சாகச பயணமாகவும் பைக்ரேஸ் உள்ளிட்ட ஆபத்தான செயல்களில் ஈடுபடக்கூடாது.

மேலும் வழிபாட்டு தலங்களில் குழப்பம் விளைவிக்க முனைவோர் மீது தகுந்த நடவடிக்கை எடுக்கப்படும். விடுமுறை காலத்தை பயன்படுத்தி குடியிருப்பு பகுதிகளில் பூட்டிய வீடுகளில் திருட்டு சம்பவங்கள் நிகழ்வதை தடுக்க போதிய ரோந்து காவலர்கள் நியமிக்கப்பட்டு கண்காணிக்கவும் நடவடிக்கை எடுக்கப்பட்டுள்ளது. கேளிக்கை விடுதிகளில் புத்தாண்டு கொண்டாட்டங்கள் சட்டத்துக்கு உட்பட்டு நடைபெறுவதை உறுதி செய்ய வேண்டுமென அறிவுறுத்தப்பட்டுள்ளது.

கடும் நடவடிக்கை

அதுமட்டுமின்றி கண்காணிப்பு கேமராக்கள் பொருத்திய ரோந்து வாகனங்கள் மூலமும் ரோந்துப்பணி மேற்கொள்ளப்படும். எனவே புத்தாண்டு கொண்டாட்டத்தின்போது யாரேனும் பொது அமைதிக்கு குந்தகம் விளைவித்தால் அவர்கள் மீது கடுமையான நடவடிக்கை எடுக்கப்படும். பொதுமக்கள், எந்தவித அசம்பாவிதமும் இல்லாத, விபத்தில்லாத புத்தாண்டாக கொண்டாட தேவையான அனைத்து நடவடிக்கைகளும் மாவட்ட காவல்துறை சார்பில் எடுக்கப்பட்டுள்ளது.

இவ்வாறு அவர் கூறினார்.