நடத்தையில் சந்தேகப்பட்டு துன்புறுத்தியதால் ஆத்திரம்: தலையில் அம்மிக்கல்லை போட்டு தொழிலாளி படுகொலை-மனைவி போலீசில் சரண்

சூரமங்கலம்:

மூட்டை தூக்கும் தொழிலாளி

சேலம் ஜாகீர்ரெட்டிப்பட்டி ஓடை தெருவை சேர்ந்தவர் ரமேஷ் (வயது 35). இவர் ஜங்சன் ரெயில் நிலையத்தில் மூட்டை தூக்கும் தொழிலாளியாக வேலை பார்த்து வந்தார். அவருடைய மனைவி மணிமேகலை (27). இவர் சேலம் ஜங்சன் ரெயில் நிலையத்தில் ஒப்பந்த அடிப்படையில் தூய்மை பணியாளராக வேலை பார்த்து வருகிறார்.

இவர்களுக்கு வெற்றிவேல் என்ற மகனும், நந்தினி என்ற மகளும் உள்ளனர். ரமேசுக்கு மதுகுடிக்கும் பழக்கம் இருந்து வந்தது. அவர் அடிக்கடி மது போதையில் வீட்டுக்கு வந்து மனைவியிடம் தகராறு செய்து வந்தார். மேலும் மனைவியின் நடத்தையில் சந்தேகப்பட்டு அவரை தினமும் அடித்து துன்புறுத்தி வந்ததாகவும் கூறப்படுகிறது. தற்போது கோடை விடுமுறையையொட்டி குழந்தைகள் 2 பேரும் கடந்த சில நாட்களுக்கு முன்பே அருகில் உள்ள உறவினர் வீட்டுக்கு சென்றுவிட்டனர்.

அம்மிக்கல்லை போட்டு கொலை

நேற்று முன்தினம் இரவு ரமேஷ், மது குடித்து விட்டு வீட்டுக்கு வந்தார். பின்னர் அவர் வழக்கம் போல் மனைவியிடம் தகராறில் ஈடுபட்டார். அப்போது இருவருக்கும் இடையே மோதல் ஏற்பட்டது. நடத்தையில் சந்தேகப்பட்டு தன்னை துன்புறுத்துவதால் ஆத்திரமடைந்த மணிமேகலை, வீட்டில் இருந்த அம்மிக்கல்லை எடுத்து போதையில் படுக்கையில் கிடந்த ரமேசின் தலையில் போட்டார். மீண்டும் அதே கல்லால் அவருடைய முகத்தில் தாக்கினார்.

இதில் படுகாயம் அடைந்த ரமேஷ் சம்பவ இடத்திலேயே ரத்த வெள்ளத்தில் துடிதுடித்து பரிதாபமாக இறந்தார். பின்னர், கொலை செய்யப்பட்ட கணவரின் உடல் அருகேயே விடிய, விடிய மணிமேகலை உட்கார்ந்திருந்தார். அதைத்தொடர்ந்து நேற்று காலை மணிமேகலை, சூரமங்கலம் போலீஸ் நிலையத்தில் சரண் அடைந்தார். அப்போது அங்கிருந்த போலீசாரிடம் தனது கணவரை தலையில் அம்மிக்கல்லை போட்டு கொலை செய்து விட்டதாக தெரிவித்தார்.

கைது செய்து விசாரணை

இதையடுத்து போலீஸ் உதவி கமிஷனர் நிலவழகன், இன்ஸ்பெக்டர் சிவக்குமார் மற்றும் போலீசார் சம்பவ இடத்துக்கு விரைந்து சென்றனர். அங்கு கொலை செய்யப்பட்டு கிடந்த ரமேசின் உடலை மீட்டு பிரேத பரிசோதனைக்காக சேலம் அரசு ஆஸ்பத்திரிக்கு அனுப்பி வைத்தனர்.

மேலும் தடயவியல் துறை நிபுணர்களும் அங்கு வந்து தடயங்களை சேகரித்தனர். கொலைக்கு பயன்படுத்தப்பட்ட அம்மிக்கல் மற்றும் ஆதாரங்களை போலீசார் கைப்பற்றினர். அதைத்தொடர்ந்து இந்த கொலை தொடர்பாக மணிமேகலையை போலீசார் கைது செய்து விசாரணை நடத்தினர். இதில் பரபரப்பு தகவல் வெளியாகி உள்ளது.

இதுகுறித்து போலீஸ் அதிகாரிகள் கூறியதாவது:-

மணிமேகலை ஜங்சன் ரெயில் நிலையத்தில் ஒப்பந்த அடிப்படையில் தூய்மை பணியில் வேலை பார்த்து வருகிறார். மனைவி யாரிடம் பேசினாலும் சந்தேகப்பட்டு ரமேஷ் அவரை அடித்து துன்புறுத்தி வந்துள்ளார்.

செக்ஸ் தொல்லை

வீட்டுக்கு மது குடித்து விட்டு வரும் ரமேஷ், மனைவிக்கு செக்ஸ் தொல்லையும் கொடுத்துள்ளார். மேலும் உல்லாசத்துக்கு அழைக்கும் போது செல்லவில்லை என்றால் மனைவியை வேறு ஒருவருடன் இணைத்து ஆபாசமாக பேசி உள்ளார். கணவரின் தொல்லை நாளுக்கு நாள் அதிகரித்து கொண்டே சென்றதால் மணிமேகலையால் அதனை பொறுத்து கொள்ள முடியவில்லை.

இந்தநிலையில் நேற்று முன்தினமும் ரமேஷ் குடித்துவிட்டு வீட்டுக்கு வந்து தகராறில் ஈடுப்பட்டதால் ஆத்திரம் தாங்காமல் அவரது தலையில் அம்மிக்கல்லை போட்டு மணிமேகலை கொலை செய்துள்ளார். தொடர்ந்து அவரிடம் விசாரணை நடத்தி வருகிறோம்.

இவ்வாறு அவர்கள் தெரிவித்தனர்.

கணவரின் தலையில் அம்மிக்கல்லை போட்டு மனைவியே கொலை செய்த சம்பவம் அந்த பகுதியில் பரபரப்பை ஏற்படுத்தியது.