தமிழக கவர்னர் ஆர்.என்.ரவி நாளை ஊட்டி வருகை

ஊட்டி

தமிழக கவர்னர் ஆர்.என்.ரவி நாளை (ஞாயிற்றுக்கிழமை) ஊட்டிக்கு வருகிறார். இதையொட்டி பலத்த போலீஸ் பாதுகாப்பு போடப்பட்டு உள்ளது.

கவர்னர் வருகை

தமிழக கவர்னர் ஆர்.என்.ரவி நாளை (ஞாயிற்றுக்கிழமை) நீலகிரி மாவட்டம் ஊட்டிக்கு வருகிறார். சென்னையில் இருந்து காலையில் விமானம் மூலம் புறப்படும் அவர், மதியம் கோவை விமான நிலையத்திற்கு வருகிறார்.

பின்னர் கோவையில் இருந்து மேட்டுப்பாளையம், கோத்தகிரி, தொட்டபெட்டா வழியாக கார் மூலம் ஊட்டிக்கு மாலை 5.30 மணிக்கு வருகிறார். அதன்பின்னர் ஊட்டி ராஜ்பவன் மாளிகையில் தங்குகிறார்.

பலத்த பாதுகாப்பு

வருகிற 9-ந்தேதி வரை ஊட்டியில் கவர்னர் இருக்கிறார். ஆனால் அவர் கலந்து கொள்ளும் நிகழ்ச்சிகள் குறித்து இதுவரை அதிகாரப்பூர்வமாக அறிவிக்கப்படவில்லை. 9-ந் தேதி காலையில் ஊட்டியில் இருந்து புறப்படும் கவர்னர் ஆர்.என்.ரவி, கோவையில் இருந்து விமானம் மூலம் சென்னைக்கு செல்கிறார் என்று தெரிவிக்கப்பட்டுள்ளது.

கவர்னரின் வருகையையொட்டி ராஜ்பவன், தாவரவியல் பூங்கா, சேரிங்கிராஸ், கோடப்பமந்து, கோத்தகிரி உள்ளிட்ட முக்கிய பகுதிகளில் பலத்த போலீஸ் பாதுகாப்பு போடப்பட்டு உள்ளது.