தமிழ் பேரவை ஆண்டு விழா

சேரன்மாதேவி:

சேரன்மாதேவி தமிழ் பேரவை 59-வது ஆண்டு விழா, சேரன்மாதேவி ஊராட்சி ஒன்றிய தொடக்கப்பள்ளி ஸ்காட் கலையரங்கில் 2 நாட்கள் நடந்தது. தமிழ் பேரவை மதிப்புறு தலைவர் செந்தில் நாயகம் தலைமை தாங்கினார். பேரூராட்சி தலைவர் தேவி அய்யப்பன் முன்னிலை வகித்தார். தமிழ் பேரவை துணைத்தலைவர் ராமன் வரவேற்று பேசினார். தாசில்தார் பாலசுப்பிரமணியன், துணை போலீஸ் சூப்பிரண்டு ராமகிருஷ்ணன் ஆகியோர் வாழ்த்தி பேசினர். செல்லப்பா குழுவினரின் தேவார பண்ணிசையும், சங்கர சரஸ்வதி நிருத்யாலயா குழுவினரின் குரலிசை மற்றும் நாதலய நாட்டியமும் நடைபெற்றது. கவி சக்கரவர்த்தி கம்பனின் பாடல்களில் பெரிதும் விஞ்சி நிற்பது சமய உணர்வா? சமுதாய உணர்வா? என்ற தலைப்பில் பட்டிமன்றம் நடைபெற்றது. கமிட்டி நடுநிலைப்பள்ளி தலைமை ஆசிரியர் கோவிந்தராஜன் நன்றி கூறினார்.

2-வது நாள் நடந்த விழாவிற்கு தமிழ் பேரவை தலைவர் கூனியூர் மாடசாமி தலைமை தாங்கினார். பொருளாளர் பொன்னழகன் வரவேற்று பேசினார். இசக்கி சுப்பையா எம்.எல்.ஏ., உதவி கலெக்டர் ரிஷப், பேராசிரியர் வளனரசு ஆகியோர் வாழ்த்தி பேசினர். வெங்கடேஸ்வரன் குழுவினரின் பண்ணிசை பாரதியார் பாடல்கள் மற்றும் தமிழக அரசின் தமிழ் செம்மல் விருது பெற்ற தமிழ் பேரவையின் மதிப்புறு தலைவர் செந்தில் நாயகத்திற்கு பாராட்டு விழா நடைபெற்றது. தமிழ் பேரவை துணை செயலாளர் சாய்ராம் நன்றி கூறினார்.