திம்பத்தில் அதிரடிப்படை 2-வது முகாம்காணொலி காட்சி மூலம் டி.ஜி.பி.சைலேந்திரபாபு திறந்து வைத்தார்

தாளவாடி

திம்பத்தில் அதிரடிப்படை 2-வது முகாமை டி.ஜி.பி. சைலேந்திரபாபு காணொலி காட்சி மூலம் திறந்து வைத்தார்.

அதிரடிப்படை 2-வது முகாம்

சத்தியமங்கலம் அருகே உள்ள குய்யனூர் வனப்பகுதியில் ஏற்கனவே அதிரடிப்படை முகாம் செயல்பட்டு வருகிறது.

இந்த நிலையில் தாளவாடி அருகே உள்ள திம்பம் மலைப்பகுதியில் 2-வதாக சிறப்பு இலக்கு படை (அதிரடிப்படை) முகாம் அமைக்கப்பட்டு உள்ளது. இந்த அதிரடிப்படை முகாமை டி.ஜி.பி. சைலேந்திரபாபு நேற்று காலை காணொலி காட்சி மூலம் திறந்து வைத்தார்.

இதைத்தொடர்ந்து நேற்று காலை திம்பம் அதிரடிப்படை முகாம் அலுவலகத்தில் நடந்த நிகழ்ச்சியில் சிறப்பு இலக்கு படை காவல்துறை தலைவர் முருகன், போலீஸ் சூப்பிரண்டு ராஜன், துணை போலீஸ் சூப்பிரண்டுகள் மற்றும் போலீசார் பலர் கலந்து கொண்டனர்.

கண்காணிப்பு பணி

திம்பம் சிறப்பு இலக்கு படையில் இன்ஸ்பெக்டர் ரங்கராஜ் தலைமையில் 30 பேர் கொண்ட போலீசார் 2-வது சிறப்பு இலக்கு படையில் இடம் பெற்றுள்ளனர்.

அவர்கள் திம்பம், கேர்மாளம், கடம்பூர், தாளவாடி சுற்று வட்டார பகுதிகள் மற்றும் வனப்பகுதிகளில் தீவிர கண்காணிப்பு பணியில் ஈடுபடுத்தப்படுவார்கள் என்று போலீஸ் அதிகாரிகள் தெரிவித்தனர்.