அடையாளம் தெரியாத வாகனம் மோதி வாலிபர் பலி

வாணியம்பாடியை அடுத்த ஆலங்காயம் அருகே உள்ள பங்கூர் பகுதியை சேர்ந்த ரவி என்பவரின் மகன் பூவரசன் (வயது 23), கூலித் தொழிலாளி. இவர், அதேப் பகுதியை சேர்ந்த தனது நண்பர் நவீன் (24) என்பவருடன் மோட்டார் சைக்கிளில் பங்கூரில் இருந்து ஆலங்காயம் நோக்கி சென்றுள்ளார். நவீன் மோட்டார் சைக்கிளை ஓட்டிச் சென்றுள்ளார்.

பெரிய ஏரிப் பகுதியில் சென்றபோது, அடையாளம் தெரியாத வாகனம் மோட்டார் சைக்கிள் மீது மோதியதாக கூறப்படுகிறது. இதில் இருவரும் தூக்கி வீசப்பட்டு தலையில் பலத்த காயம் ஏற்பட்ட பூவரசன் சம்பவ இடத்திலேயே பரிதாபமாக உயிரிழந்தார். நவீன் பலத்த காயமடைந்துள்ளார்.

இது குறித்து அப்பகுதி மக்கள் ஆலங்காயம் போலீசாருக்கு தெரிவித்துள்ளனர். அதன்பேரில் சம்பவ இடத்திற்கு விரைந்து வந்த போலீசார், நவீனை மீட்டு சிகிச்சைக்காக வாணியம்பாடி அரசு மருத்துவமனைக்கு அனுப்பி வைத்தனர். பின்னர் மேல் சிகிச்சைக்காக வேலூர் அரசு மருத்துவமனைக்கு அனுப்பி வைக்கப்பட்டார்.

பூவரசன் உடலை பிரேத பரிசோதனைக்காக வாணியம்பாடி அரசு மருத்துவமனைக்கு அனுப்பி வைத்தனர். இந்த விபத்து குறித்து ஆலங்காயம் போலீசார் வழக்கு பதிவு செய்த விசாரணை நடத்தி வருகின்றனர்.