வாகனம் மோதி வாலிபர் பலி

மங்களமேடு:

பெரம்பலூர் மாவட்டம், மங்களமேடு பகுதியில் உள்ள சென்னை-திருச்சி தேசிய நெடுஞ்சாலையை நேற்று அதிகாலை சுமார் 30 வயது மதிக்கத்தக்க வாலிபர் ஒருவர் கடக்க முயன்றார். அப்போது அந்த வழியாக சென்ற ஒரு வாகனம் அவர் மீது மோதிவிட்டு நிற்காமல் சென்றுவிட்டது. இதில் படுகாயம் அடைந்த அந்த வாலிபர் சம்பவ இடத்திலேயே பரிதாபமாக உயிரிழந்தார். இதைக்கண்ட அப்பகுதி மக்கள் இதுகுறித்து மங்களமேடு போலீசாருக்கு தகவல் தெரிவித்தனர்.

அதன்பேரில் போலீசார் சம்பவ இடத்திற்கு விரைந்து சென்று அந்த வாலிபரின் உடலை கைப்பற்றி பிரேத பரிசோதனைக்காக பெரம்பலூர் அரசு மருத்துவமனைக்கு அனுப்பி வைத்தனர். பின்னர் இது குறித்து வழக்குப்பதிவு செய்து விபத்தில் இறந்த வாலிபர் யார்? எந்த ஊரை சேர்ந்தவர்? விபத்தை ஏற்படுத்திவிட்டு நிற்காமல் சென்ற வாகனம் எது? என்பன உள்பட பல்வேறு கோணங்களில் விசாரணை நடத்தி வருகின்றனர்.