டாக்டர் பா.சிவந்தி ஆதித்தனார் உருவப்படத்திற்கு தெலுங்கானா கவர்னர் தமிழிசை சவுந்தரராஜன் மரியாதை

பத்மஸ்ரீ டாக்டர் பா.சிவந்தி ஆதித்தனார் 88-வது பிறந்த நாள் விழா நேற்று கொண்டாடப்பட்டது. இதையொட்டி நெல்லையில் உள்ள 'மாலைமலர்' அலுவலகத்தில் அலங்கரித்து வைக்கப்பட்டிருந்த டாக்டர் பா.சிவந்தி ஆதித்தனார் உருவப்படத்திற்கு தெலுங்கானா மற்றும் புதுச்சேரி கவர்னர் டாக்டர் தமிழிசை சவுந்தரராஜன் மாலை அணிவித்து மரியாதை செலுத்தினார். பின்னர் அவர் கூறியதாவது:-

பத்மஸ்ரீ டாக்டர் பா.சிவந்தி ஆதித்தனாரின் 88-வது பிறந்த நாள் கொண்டாடப்படுகிறது. வழக்கமாக அவரது பிறந்த நாளுக்கு சென்னையில் அவர் வாழ்ந்த வீட்டில் தான் மாலை அணிவித்து மரியாதை செலுத்துவேன். நெல்லை-சென்னை 'வந்தே பாரத்' ரெயில் தொடக்க விழாவில் பங்கேற்பதற்காக நெல்லைக்கு வந்ததால் இங்கு அவரது உருவப்படத்திற்கு மரியாதை செலுத்தி உள்ளேன்.

விளையாட்டு துறையில் இளைஞர்களை ஊக்கப்படுத்துவதிலும், ஊடகத்துறையில் இளைஞர்களை ஊக்கப்படுத்துவதிலும் தன்னிகரற்று விளங்கிய பத்மஸ்ரீ டாக்டர் பா.சிவந்தி ஆதித்தனார் ஆன்மிக துறையிலும் சிறந்து விளங்கினார். ஆசிய அளவிலான விளையாட்டு போட்டியில் இந்தியா 2 பதக்கங்களை பெற்றுள்ளது. இத்தகைய சாதனைகளுக்கு அவர் விளையாட்டு துறையில் முன்னுதாரணமாக விளங்கியதே காரணமாகும். இவ்வாறு அவர் கூறினார்.

அப்போது, பா.ஜனதா நெல்லை மாவட்ட தலைவர் தயாசங்கர், மாவட்ட செயலாளர் நாகராஜன் ஆகியோர் உடன் இருந்தனர்.