பஸ் உரசியதால் தவறி விழுந்து குழந்தை பலி

ராணிப்பேட்டை மாவட்டம் வாலாஜாபேட்டை பஜாரில் குளிர்பான கடை நடத்தி வருபவர் பாரூக். இவரது மனைவி ஷாயின்பானு. இவர்களுக்கு அஸ்மா பர்வீன் (வயது 7) என்ற மகளும், பரான் (2) என்ற மகனும் உண்டு. பாரூக் தனது மகள் படிக்கும் பள்ளியில் பாட புத்தகங்கள் வாங்குவதற்காக மோட்டார் சைக்கிளில் காவேரிபாக்கம் நோக்கி சென்று கொண்டிருந்தார். அவருடன் அவரது மனைவி ஷாயின்பானு, 2 வயது மகன்பரான் ஆகியோரும் சென்றனர். அரசு மகளிர் கல்லூரி அருகில் சென்று கொண்டிருந்தபோது வேலூரில் இருந்து கல்பாக்கம் நோக்கி சென்ற அரசு பஸ் மோட்டார் சைக்கிள் மீது உரசியது.

இதில் ஷாயின்பானு மடியில் வைத்திருந்த 2 வயது ஆண் குழந்தை நழுவி சாலையில் விழுந்தது. இதில் பலத்த காயமடைந்த குழந்தை சம்பவ இடத்திலேயே உயிரிழந்தது. இதுபற்றி தகவல் அறிந்த வாலாஜா போலீசார் விரைந்து சென்று குழந்தையின் உடலை கைப்பற்றி பரிசோதனைக்காக அரசு மருத்துவமனைக்கு அனுப்பி வைத்தனர். மேலும் இதுகுறித்து வழக்குப்பதிவு செய்து விசாரணை நடத்தி வருகின்றனர்.