108 ஆம்புலன்சில் பெண்ணுக்கு குழந்தை பிறந்தது

சேலம் மாவட்டம் ஏற்காடு கோவிலூர் கிராமத்தை சேர்ந்தவர் கணேசன். இவரது மனைவி ருக்குமணி. இவர்களுக்கு ஏற்கனவே ஒரு குழந்தை உள்ளது. இந்நிலையில், 2-வது முறையாக ருக்குமணி கர்ப்பமானார். நிறைமாத கர்ப்பிணியாக இருந்த அவருக்கு நேற்று முன்தினம் திடீரென பிரசவ வலி ஏற்பட்டது. இதையடுத்து 108 ஆம்புலன்ஸ் மூலம் அவரை உறவினர்கள் சிகிச்சைக்காக வாழவந்தி ஆரம்ப சுகாதார நிலையத்திற்கு அழைத்து சென்றனர். ஆனால் செல்லும் வழியிலேயே ருக்குமணிக்கு ஆம்புலன்சில் அழகான ஆண் குழந்தை பிறந்தது. பின்னர் தாயும், சேயும் வாழவந்தி அரசு ஆரம்ப சுகாதார நிலையத்தில் சேர்க்கப்பட்டனர். அங்கு டாக்டர்கள் கண்காணிப்பில் ருக்குமணி சிகிச்சை பெற்று வருகிறார். கர்ப்பிணிக்கு 108 ஆம்புலன்சில் பிரசவம் பார்த்த மருத்துவ ஊழியர் கோபிநாத் மற்றும் டிரைவர் சேட்டு ஆகியோருக்கு பொதுமக்கள் பாராட்டு தெரிவித்தனர்.