கம்மலை பறித்ததால் காது கிழிந்தது; ரத்தம் சொட்ட சொட்ட ஓடிய பெண்

ராஜாக்கமங்கலம்:

ராஜாக்கமங்கலம் அருகே மர்ம நபர்கள் பெண்ணின் கம்மலை பறித்து அட்டூழியத்தில் ஈடுபட்டனர். இதனால் காது கிழிந்து அந்த பெண் ரத்தம் சொட்ட, சொட்ட ஓடிய சம்பவம் பரபரப்பை ஏற்படுத்தியது.

கம்மலை பறித்த மர்மநபர்கள்

ராஜாக்கமங்கலம் அருகே பூச்சிவிளாகம் பகுதியை சேர்ந்தவர் தங்க கிருஷ்ணன். இவருடைய மனைவி விஜய நிர்மலா (வயது 40). சம்பவத்தன்று மதியம் இவர் தனது வீட்டில் வளர்க்கும் கால்நடைக்கு தேவையான புல்லை கீழத்தாராவிளை சாலை பகுதியில் பிடுங்கி கொண்டிருந்தார். அப்போது அந்த வழியாக மோட்டார் சைக்கிளில் மர்ம நபர்கள் 2 பேர் வந்தனர். விஜய நிர்மலா அருகில் சென்ற அவர்கள் மெக்கானிக் கடை இந்த பகுதியில் உள்ளதா? என கேட்பது போல் நடித்தனர்.

அதற்கு அவர் பதில் கூறிக் கொண்டிருந்த போது மோட்டார் சைக்கிளில் வந்தவர்களில் ஒருவர் திடீரென விஜய நிர்மலா காதில் கிடந்த கம்மல் மற்றும் காது மாட்டியை பிடித்து இழுத்து பறித்தார்.

காது கிழிந்தது

இதில் அந்த பெண்ணின் காது கிழிந்து ரத்தம் கொட்டியது. இதனால் அவர் சத்தம் போடவே மர்ம நபர்கள் அங்கிருந்து தப்பி சென்றனர்.

அதே சமயத்தில் காதில் இருந்து ரத்தம் சொட்ட, சொட்ட பெண் பின்னாலேயே ஓடினார். ஆனால் மர்ம நபர்களை பிடிக்க முடியவில்லை. 3 கிராம் கம்மல், மாட்டியை மர்மநபர்கள் பறித்து சென்றனர்.

மேலும் இதுகுறித்து அவர் ராஜாக்கமங்கலம் போலீஸ் நிலையத்தில் புகார் அளித்தார். அதன்பேரில் ராஜாக்கமங்கலம் போலீசார் வழக்குப்பதிவு செய்து தப்பி ஓடிய கொள்ளையர்களை தேடி வருகின்றனர்.