சரக்கு வாகன டிரைவரிடம் நூதன முறையில் ரூ.50 ஆயிரம் மோசடி மர்மநபருக்கு போலீ்ஸ் வலைவீச்சு

மேல்மலையனூர் தாலுகா கன்னலம் கிராமத்தை சேர்ந்தவர் அன்பரசன் (வயது 28), சரக்கு வாகன டிரைவர். இவருடைய செல்போனுக்கு அடையாளம் தெரியாத நபர், 6 வெவ்வேறு எண்களில் இருந்து தொடர்புகொண்டு பேசினார். அப்போது அந்த நபர், தான் தனியார் நிதி நிறுவனத்தில் இருந்து பேசுவதாகவும், கடன் தேவையெனில் உங்களுடைய விவரங்களை அனுப்பி வைக்குமாறு கூறியதன்பேரில் அன்பரசன், தனது விவரங்களை அனுப்பியுள்ளார். பின்னர் ரூ.5 லட்சம் கடன் தருவதாகவும், அதற்காக கடனுதவியை வங்கி கணக்கில் செலுத்த குறைந்தபட்சம் ரூ.50 ஆயிரம் வைத்திருக்க வேண்டும் எனக்கூறியுள்ளார். இதை நம்பிய அன்பரசன், ரூ.50 ஆயிரத்தை தனக்கு தெரிந்த நண்பர்கள் சிலரிடமிருந்து கடன்பெற்று தனது வங்கி கணக்கில் டெபாசிட் செய்து அதனை ஸ்கிரீன்ஷாட் எடுத்து அந்த நபருக்கு அனுப்பியுள்ளார். அதன் பிறகு அன்பரசனை தொடர்புகொண்ட மர்ம நபர், 10 நிமிடங்களில் கடன் தொகை, வங்கி கணக்கில் செலுத்தப்படும் எனக்கூறி ஏ.டி.எம். அட்டை எண், காலாவதி ஆகும் தேதி, ரகசிய எண், ஓ.டி.பி. எண் ஆகியவற்றை கேட்டு பெற்றுக்கொண்டார். இவற்றை கொடுத்த சில மணி நேரத்தில் அன்பரசனின் வங்கி கணக்கில் இருந்து ரூ.49 ஆயிரத்து 898-ஐ ஒரே தவணையில் மர்ம நபர் அபேஸ் செய்திருப்பது தெரியவந்தது. இதுகுறித்து அன்பரசன், விழுப்புரம் சைபர்கிரைம் பிரிவு போலீசில் புகார் செய்தார். அதன்பேரில் போலீசார் வழக்குப்பதிவு செய்து மர்ம நபரை வலைவீசி தேடி வருகின்றனர்.