தொழிலாளியை மிரட்டிய ரவுடி கைது

பாளையங்கோட்டையை சேர்ந்தவர் நாராயணன் (வயது 40). தொழிலாளி. இவர் நேற்று முன்தினம் மேலப்பாளையம் குறிச்சி வாய்க்கால் பாலம் பகுதியில் நடந்து சென்றுகொண்டு இருந்தார். அப்போது அங்கு வந்த மர்மநபர் ஒருவர் நாராயணனை அரிவாளை காட்டி மிரட்டி அவர் வைத்திருந்த ரூ.1,110-யை பறித்துச்சென்றுள்ளார்.

இதுகுறித்த புகாரின் பேரில் மேலப்பாளையம் போலீஸ் இன்ஸ்பெக்டர் விஜி வழக்குப்பதிவு செய்து விசாரணை நடத்தினார். விசாரணையில் அரிவாளை காட்டி மிரட்டி பணம் பறித்தவர் மேலப்பாளையம் குலவணிகர்புரத்தை சேர்ந்த முருகேஷ் குமார் என்ற குறிச்சி குமார் (36) என்பது தெரியவந்தது. இதனையடுத்து போலீசார் அவர் மீது வழக்குப்பதிவு செய்து கைது செய்தனர். முருகேஷ்குமார் என்ற குறிச்சி குமாரை மேலப்பாளையம் போலீசார் ரவுடி பட்டியலில் வைத்து அவரை தொடர்ந்து கண்காணித்து வந்தது குறிப்பிடத்தக்கது.