காட்டெருமையை துரத்திய புலியால் பரபரப்பு

கூடலூர்,

முதுமலை புலிகள் காப்பகத்தில் காட்டு யானைகள், புலிகள் உள்ளிட்ட வனவிலங்குகள் உள்ளன. இதை கண்டு ரசிக்க தினமும் ஏராளமான சுற்றுலா பயணிகள் முதுமலைக்கு வருகின்றனர். இதன் காரணமாக வனத்துறையினர் வாகனத்தில் சுற்றுலா பயணிகள் சவாரிக்காக அழைத்துச் செல்லப்படுகின்றனர். அப்போது காட்டு யானைகள், மான்கள், காட்டெருமைகள் ஆகிய வனவிலங்குகள் அடிக்கடி தென்படும். ஆனால், பெரும்பாலான சுற்றுலா பயணிகள் புலிகளை பார்த்து விட வேண்டும் என்ற ஆவலில் வந்து செல்கின்றனர். இருப்பினும், மிக அபூர்வமாகவே புலி வனப்பகுதியில் நடமாடுவதை காண முடியும். இந்தநிலையில் முதுமலை வனப்பகுதியில் சுற்றுலா பயணிகள் சென்று கொண்டிருந்தபோது, புலி ஒன்று காட்டெருமையை துரத்துவதை கண்டனர். தொடர்ந்து தங்களது செல்போனில் பதிவு செய்தனர். காட்டெருமையும் வேகமாக ஓடி புலியிடம் இருந்து தப்பியது. இந்த காட்சி சமூக வலைத்தளங்களில் வைரலாக பரவி வருகிறது.