கார் மீது மோதிய லாரி கவிழ்ந்தது

நல்லம்பள்ளி:

தொப்பூர் கணவாயில் கார் மீது மோதிய லாரி கவிழ்ந்து டிரைவர்கள் உள்பட 4 பேர் படுகாயம் அடைந்தனர்.

கார் மீது லாரி மோதியது

மராட்டிய மாநிலத்தில் இருந்து கோழி தீவனம் ஏற்றி கொண்டு ஒரு லாரி ஈரோட்டுக்கு புறப்பட்டது. இந்த லாரியை ஈரோட்டை சேர்ந்த டிரைவர் கோபால் (வயது58) ஓட்டி வந்தார். அவருடன் மாற்று டிரைவராக ராஜேந்திரன் (62) என்பவர் உடன் வந்தார். தர்மபுரி மாவட்டம் தொப்பூர் கணவாய் 2-வது வளைவில் லாரி வந்தபோது சாலையில் தறுமாறாக ஓடி, முன்னால் சென்ற கார் மீது மோதியது.

பின்னர் கட்டுப்பாட்டை இழந்து லாரி சாலையின் சென்டர் மீடியனில் மோதி கவிழ்ந்தது. இந்த விபத்தில் கார் மற்றும் லாரி நொறுங்கியது. இதில் இடிபாடுகளில் சிக்கி லாரி டிரைவர்கள் மற்றும் காரில் வந்த கோவையை சேர்ந்த கோபாலகிருஷ்ணன் (62), கலா (56) ஆகிய 4 பேரும் படுகாயம் அடைந்தனர்.

போக்குவரத்து பாதிப்பு

இந்த விபத்து குறித்து தகவல் அறிந்ததும் தொப்பூர் போலீசார் மற்றும் சுங்கச்சாவடி ரோந்து படையினர் விரைந்து வந்து விபத்தில் சிக்கிய 4 பேரையும் மீட்டு தர்மபுரி அரசு மருத்துவமனைக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. தொடர்ந்து போலீசார் விபத்துக்குள்ளான லாரி மற்றும் காரை அப்புறப்படுத்தினர்.

இந்த விபத்து காரணமாக தர்மபுரி-சேலம் தேசிய நெடுஞ்சாலையில் 2 மணி நேரத்திற்கு மேலாக போக்குவரத்து பாதிக்கப்பட்டது. இது குறித்து தொப்பூர் போலீசார் வழக்குப்பதிவு செய்து விசாரணை நடத்தி வருகின்றனர்.