பெண்ணை தாக்கிய வேன் டிரைவர் கைது

கரூர் மாவட்டம் கடவூர் அருகே உள்ள சீலமநாயக்கனூரை சேர்ந்தவர் பொன்மலர் (வயது 22). இவர், வடமதுரை அருகே உள்ள தனியார் நூற்பாலையில் தொழிலாளியாக வேலை பார்த்து வருகிறார். வழக்கமாக இவர், நூற்பாலை வேன் ஒன்றில் வேலைக்கு செல்வது வழக்கம். அந்த வேனில் எஸ்.புதுப்பட்டியை சேர்ந்த வேல்முருகன் (30) என்பவர் டிரைவராக வேலை பார்த்து வந்தார்.

இந்த நிலையில் பொன்மலருக்கும், வேல்முருகனுக்கும் இடையே தகராறு இருந்து வந்தது. இதனையடுத்து கடந்த 4-ந்தேதி பொன்மலரை, ேவனில் ஏற்றாமல் வேல்முருகன் சென்றதாக கூறப்படுகிறது.

இதுகுறித்து நூற்பாலை நிர்வாகத்திடம் பொன்மலர் புகார் செய்தார். இதன் எதிரொலியாக, நூற்பாலை நிர்வாகம் வேல்முருகனை வேலையை விட்டு நிறுத்தியதாக கூறப்படுகிறது. இதனால் வேல்முருகன் ஆத்திரம் அடைந்தார். இந்தநிலையில் நேற்று முன்தினம் மாலை பொன்மலர் வேனில் வேலைக்கு சென்று கொண்டிருந்தார். அப்போது வேனை வழி மறித்த வேல்முருகன், பொன்மலரை ஆபாசமாக பேசியதோடு அவரை தாக்கி, கொலை மிரட்டல் விடுத்தார். இதுகுறித்து வடமதுரை போலீஸ் நிலையத்தில் பொன்மலர் புகார் செய்தார். அதன்பேரில் போலீஸ் சப்-இன்ஸ்பெக்டர் பழனிச்சாமி வழக்குப்பதிவு செய்து, வேல்முருகனை கைது செய்தார்.