அகழாய்வில் கிடைத்த பொருட்களை ஆவணப்படுத்தும் பணிகள் தீவிரம்

தாயில்பட்டி,

வெம்பக்கோட்டை அருகே அகழாய்வில் கிடைத்த பொருட்களை ஆவணப்படுத்தும் பணிகள் தீவிரமாக நடந்து வருகிறது.

ஆவணப்படுத்த முயற்சி

வெம்பக்கோட்டை அருகே உள்ள விஜய கரிசல்குளத்தில் 2-ம் கட்ட அகழாய்வு பணிகள் நடைபெற்று வருகிறது. இந்த அகழாய்வில் கிடைத்து வரும் பொருட்களை சுத்தம் செய்தல், புகைப்படம் எடுத்தல், வரைபடம் தயாரித்தல் உள்ளிட்ட ஆவணப்படுத்தும் பணிகள் தீவிரமாக நடைபெற்று வருகின்றன.

இதனை கேரளா, தமிழ்நாட்டில் உள்ள தொல்லியல் பயிற்சி பெறும் மாணவ-மாணவிகள் பார்வையிட்டனர். மேலும் தற்போது நடைபெற்று வரும் அகழாய்வில் நீர் கிண்ணம், சுடுமண்ணால் செய்யப்பட்ட பொம்மைகள், உள்பட 2,780 பொருட்கள் கண்டெடுக்கப்பட்டுள்ளன.

4 ஆயிரம் பேர் பார்வையிட்டனர்

மேலும் முதல்கட்ட அகழாய்வில் கிடைத்த பொருட்கள் வைக்கப்பட்ட கண்காட்சியை விருதுநகர் மாவட்டம் மற்றும் பல்வேறு பகுதிகளை சேர்ந்த மாணவர்கள், சுற்றுலா பயணிகள் பார்வையிட்டு செல்கின்றனர். மாணவ-மாணவிகளுக்கு கண்காட்சி பற்றியும், தற்போது நடைபெற்று வரும் அகழாய்வு குறித்த சந்தேகங்களுக்கு தொல்லியல் இயக்குனர் பொன் பாஸ்கர் விளக்கம் அளித்தார்.

மேலும் கண்காட்சியினை இதுவரை 4 ஆயிரத்திற்கும் ேமற்பட்டவர்கள் பார்வையிட்டதாக அவர் தெரிவித்தார்.