கல்வி உதவித்தொகை நுழைவு தேர்வுக்கு விண்ணப்பிக்க இன்று கடைசி நாள்

கல்வி உதவித்தொகை

இதர பிற்படுத்தப்பட்டோர், பொருளாதாரத்தில் பின் தங்கியவர்கள் மற்றும் சீர் மரபினர் இனத்தை சார்ந்த 15 ஆயிரம் மாணவ-மாணவிகளுக்கு கல்வி உதவித்தொகை வழங்கும் திட்டம் மத்திய அரசின் மூலம் செயல்படுத்தப்பட உள்ளது. இத்திட்டத்தில் பயன்பெற இதர பிற்படுத்தப்பட்ட வகுப்பினர், பொருளாதாரத்தில் பின்தங்கிய வகுப்பினர், சீர்மரபினர் ஆக இருக்க வேண்டும். பெற்றோர், பாதுகாவலர்கள் ஆண்டு வருமானம் ரூ.2½ லட்சத்துக்கு மிகாமல் இருக்க வேண்டும்.

https://yet.nta.ac.in என்ற இணையதள முகவரியில் பட்டியலிடப்பட்டுள்ள பள்ளிகளில் 9 அல்லது 11-ம் வகுப்பில் படித்து கொண்டு இருக்க வேண்டும். மேற்படி திட்டத்தில் 9, 10-ம் வகுப்பு படிக்கும் மாணவ-மாணவிகளுக்கு கல்வி உதவித்தொகையாக ஆண்டொன்றுக்கு ரூ.75 ஆயிரமும், 11, 12-ம் வகுப்பு மாணவ-மாணவிகளுக்கு கல்வி உதவித்தொகையாக ஆண்டொன்றுக்கு ரூ.1 லட்சத்து 25 ஆயிரமும் வழங்கப்படும்.

இன்று கடைசி நாள்

தேசிய தேர்வு முகமை நடத்தும் PM-YASASVI நுழைவுத் தேர்வில் பெற்ற தகுதியின் அடிப்படையில் தேர்வு செய்யப்படுவர். இத்தேர்வு கணினி அடிப்படையில் நடத்தப்படும். இந்த தேர்வுக்கு விண்ணப்பிக்க இன்று (வெள்ளிக்கிழமை) கடைசி நாளாகும். விண்ணப்பங்கள் திருத்தம் செய்வதற்கான கால அவகாசம் நாளை (சனிக்கிழமை) முதல் வருகிற 31-ந்தேதி வரை ஆகும். தேர்வு நுழைவுச்சீட்டு வெளியிடப்படும் நாள் அடுத்த மாதம் (செப்டம்பர்) 5-ந்தேதி ஆகும். தேர்வு நடைபெறும் நாள் அடுத்த மாதம் 11-ந்தேதி ஆகும்.

மாணவ-மாணவிகள் செயல்பாட்டில் இருக்கும் மொபைல் எண், ஆதார் எண், ஆதார் இணைக்கப்பட்ட வங்கி கணக்கு எண், வருமான சான்றிதழ் மற்றும் சாதி சான்றிதழ் ஆகிய ஆவணங்களுடன் விண்ணப்பிக்க வேண்டும். மேற்படி இத்திட்டத்திற்கான வழிகாட்டுதல்கள் விரிவான தகுதி அளவுகோல்கள் மற்றும் பிற விவரங்களை https://yet.nta.ac.in மற்றும் http://socialjustice.gov.in/schemes ஆகிய இணையதள முகவரியில் தெரிந்து கொள்ளலாம் என அரியலூர் மாவட்ட கலெக்டர் அலுவலகம் சார்பில் தெரிவிக்கப்பட்டுள்ளது.