கொடைக்கானலில் சுற்றுலா பயணிகள் வருகை அதிகரிப்பு; போக்குவரத்து நெரிசல்

'மலைகளின் இளவரசி'யான கொடைக்கானலுக்கு வாரவிடுமுறை நாட்களில் சுற்றுலா பயணிகளின் வருகை அதிகரித்து காணப்படுவது வழக்கமாக உள்ளது. இதனையடுத்து குளுகுளு சீசன் முடிவடையும் நிலையிலும் வார விடுமுறையான இன்றும் அதிகாலை முதலே தமிழகம் மட்டுமின்றி வெளிமாநில சுற்றுலா பயணிகளின் வருகை அதிகரித்து காணப்பட்டது. நூற்றுக்கணக்கான வாகனங்களில் சுற்றுலா பயணிகள் வருகையால் சோதனை சாவடியில் வாகனங்கள் செல்ல முடியாமல் வெள்ளி நீர்வீழ்ச்சி பகுதியில் நீண்ட வரிசையில் அணிவகுத்து நின்றன. இதனால் கடும் போக்குவரத்து நெரிசல் ஏற்பட்டது.

மேலும் போக்குவரத்து பாதிப்பு காரணமாக சுற்றுலா பயணிகள் உரிய நேரத்தில் சுற்றுலா இடங்களுக்கு செல்ல முடியாமல் அவதிப்பட்டனர். இதனை தடுக்க சோதனை சாவடி 2 நுழைவாயில் பகுதிகளில் சுற்றுலா பயணிகளின் வாகனங்களை அனுமதிக்க நகராட்சி நிர்வாகம் முன்வரவேண்டும். மேலும் வாரவிடுமுறை நாட்களில் சுற்றுலா பயணிகளின் வருகை அதிகரித்து காணப்படுவதால் போக்குவரத்து நெரிசலை சீரமைக்க கூடுதல் போலீசாரை நியமிக்க வேண்டும் என்று சுற்றுலா பயணிகள் கோரிக்கை விடுத்துள்ளனர்.