மாடு திருடிய வியாபாரி கைது

சாணார்பட்டி அருகே உள்ள ராகலாபுரத்தை சேர்ந்தவர் கார்த்திக் (வயது 33). விவசாயி. இவர் வளர்த்து வந்த பசுமாடு, கடந்த சில தினங்களுக்கு முன்பு திருடு போனது. இதுகுறித்து சாணார்பட்டி போலீஸ் நிலையத்தில் கார்த்திக் புகார் அளித்தார். அதன்பேரில் போலீசார் வழக்குப்பதிவு விசாரணை நடத்தினர். மேலும் அப்பகுதியில் பொருத்தப்பட்டிருந்த கண்காணிப்பு கேமராக்களை போலீசார் ஆய்வு செய்தனர். அதில் மினி வேனில் பசுவை ஏற்றி செல்லும் காட்சி பதிவாகி இருந்தது. அதனை துருப்புச்சீட்டாக பயன்படுத்தி போலீசார் விசாரணை மேற்கொண்டனர்.

இந்தநிலையில் கொசவப்பட்டி பகுதியில் சென்று கொண்டிருந்த மினிவேனை போலீசார் பிடித்தனர். அந்த வேனை ஒட்டி வந்தவரிடம் போலீசார் விசாரித்தனர். விசாரணையில் அவர், மதுரை மாவட்டம் அலங்காநல்லூரை சேர்ந்த பெரியசாமி (25) என்று தெரியவந்தது. கடந்த சில மாதங்களாக இவர், சாணார்பட்டி பகுதியில் மினிவேனில் காய்கறி வியாபாரம் செய்து வந்ததும், அவர் கார்த்திக்கின் பசுமாட்டை திருடி சென்றதும் தெரியவந்தது. இதனையடுத்து பெரியசாமியை போலீசார் கைது செய்தனர்.