வாகனம் மோதி வியாபாரி பலி

திருப்பத்தூர் மாவட்டம் நாட்டறம்பள்ளியை அடுத்த மேல் அக்ராவரம் பகுதியை சேர்ந்தவர் அனுமந்தன் (வயது55). மாட்டு வியாபாரம் செய்து வந்தார். இவர் நேற்று வீட்டில் இருந்து வெலக்கல்நத்தம் பகுதிக்கு மொபட்டில் சென்றார். சுண்ணாம்பு குட்டை என்ற இடத்தின் அருகே சென்றபோது அடையாளம் தெரியாத வாகனம் மோதியதில் அனுமந்தன் சம்பவம் இடத்திலேயே உயிரிழந்தார்.

இது குறித்து தகவலறிந்ததும் நாட்டறம்பள்ளி போலீஸ் சப்-இன்ஸ்பெக்டர் முனிரத்தினம் மற்றும் போலீசார் சம்பவம் இடத்திற்கு விரைந்து சென்று பிணத்தை கைப்பற்றி பிரேத பரிசோதனைக்காக திருப்பத்தூர் அரசு மருத்துவமனைக்கு அனுப்பி வைத்தனர். மேலும் இவரது மகன் செந்தமிழன் கொடுத்த புகாரின் பேரில் நாட்டறம்பள்ளி போலிசார் வழக்குப் பதிவு செய்து விபத்து ஏற்படுத்திய வாகனம் குறித்து விசாரணை நடத்தி வருகின்றனர்.