வனவிலங்குகள் கணக்கெடுப்பு பயிற்சி

தளி,

உடுமலையை அடுத்த ஆனைமலை புலிகள் காப்பக பகுதியில் உடுமலை மற்றும் அமராவதி வனச்சரகங்கள் உள்ளன. இங்கு யானை, புலி, செந்நாய், சிறுத்தை, புள்ளிமான், கடமான், புனுகு பூனை, கீரிப்பிள்ளை, காட்டுப்பன்றி, முள்ளம்பன்றி, கரடி, கருமந்தி, உடும்பு, காட்டெருமை, மலைப்பாம்பு உள்ளிட்ட ஏராளமான வனவிலங்குகள் உள்ளன. அந்த வகையில் இன்று (செவ்வாய்க்கிழமை) முதல் உடுமலை, அமராவதி, கொழுமம், வந்தரவு உள்ளிட்ட வனச்சரகத்தில் குளிர்கால கணக்கெடுப்பு பணிகள் தொடங்க உள்ளது.இதற்கான பயிற்சி முகாம் நேற்று உடுமலையில் உள்ள மாவட்ட வன அலுவலகத்தில் நடைபெற்றது.

பயிற்சிக்கு ஆனைமலை புலிகள் காப்பக துணை இயக்குனர் மற்றும் மாவட்ட வன அலுவலர் தேஜஸ்வி, உதவி வனப்பாதுகாவலர் மற்றும் உதவி இயக்குனர் கணேஷ்ராம் ஆகியோர் தலைமை வகித்தனர்.அதைத் தொடர்ந்து உயிரியலாளர் மகேஷ்குமார் சரக வாரியாக வனத்துறையினருக்கு பயிற்சி அளித்தார். அப்போது முதல் மூன்று நாட்களில் தாவர உண்ணிகளை கணக்கீடு செய்வது குறித்தும், அடுத்த மூன்று நாட்களில் நேர்கோட்டுப் பாதையில் சென்று கணக்கீடு செய்வது குறித்தும் பணியாளர்களுக்கு விரிவாக பயிற்சி அளிக்கப்பட்டது. பயிற்சியின் முடிவில் களப்பணிக்கு தேவையான உபகரணங்கள் வனத்துறையினர்க்கு வழங்கப்பட்டது.

---