2-ம் நிலை காவலர்களுக்கு பயிற்சி வகுப்புகள் தொடங்கியது

மேட்டூர்:-

மேட்டூர் காவலர் பயிற்சி பள்ளியில் 2-ம் நிலை காவலர்களுக்கு பயிற்சி வகுப்புகள் தொடங்கியது.

பயிற்சி

தமிழகத்தில் 2-ம் நிலை காவலர்களுக்கான தேர்வில் வெற்றி பெற்றவர்களில் 484 ஆண் பயிற்சி காவலர்களுக்கு மேட்டூரில் உள்ள காவலர் பயிற்சி மையத்தில் பயிற்சி வகுப்புகள் தொடங்கியது. இந்த பயிற்சி வகுப்பினை காவல்துறை தலைமை இயக்குனர் சைலேந்திரபாபு சென்னையிலிருந்து காணொலி காட்சி மூலமாக தொடங்கி வைத்தார். அப்போது அவர் பேசும் போது, பயிற்சி வகுப்பிற்கு வந்துள்ள அனைவரும் ஏழை- எளிய குடும்பத்தில் இருந்து மிகவும் கஷ்டப்பட்டு இந்த இடத்திற்கு வந்துள்ளீர்கள். பயிற்சி பள்ளியில் அளிக்கப்படும் கவாத்து பயிற்சி, சட்ட பயிற்சி, உள்ளிட்ட அனைத்து பயிற்சிகளையும் சிறப்பாக கற்றுக் கொள்ள வேண்டும். காவல் துறையில் சேர்ந்த பிறகு இதே பணியில் இல்லாமல் தொடர்ந்து படித்து சப்-இன்ஸ்பெக்டர், துணை கண்காணிப்பாளர் போன்ற உயர் பதவிகளுக்கு தேர்ச்சி பெற வேண்டும். பொது மக்களிடம் அன்போடு பழக வேண்டும். காவல் நிலையங்களில் பணிபுரியும் போது புகார் தரும் பொதுமக்களிடம் பணிவுடன் நடந்து கொள்ள வேண்டும். தொடர்ந்து பயிற்சிகளை பெற்று சிறப்பாக பணிபுரிய வாழ்த்துகிறேன் என்றார்.

21 மாவட்டங்களில்...

பயிற்சி வகுப்பில் தர்மபுரி, மயிலாடுதுறை, தூத்துக்குடி, தஞ்சாவூர், கள்ளக்குறிச்சி உள்ளிட்ட 21 மாவட்டங்களில் இருந்து ஆண் பயிற்சி காவலர்கள் கலந்து கொண்டனர். பயிற்சி காவலர்களுக்கு 7 மாத அடிப்படை பயிற்சியாக கவாத்து பயிற்சி, சட்ட வகுப்பு, துப்பாக்கி சூடும் பயிற்சி, ஒழுக்கம் |பொதுமக்களிடம் அணுகுமுறை பற்றிய சிறப்பான வகுப்புகள் பள்ளி ஆசிரியர்களால் நடத்தப்பட்டு அதன் பிறகு தமிழக காவல்துறையில் இணைந்து பணியாற்ற உள்ளார்கள்.

விழாவில் மேட்டூர் காவல் பயிற்சி பள்ளி முதல்வர் ராஜேந்திரன் தலைமையில் துணை முதல்வர் நாகராஜன், இன்ஸ்பெக்டர் கவிதாஉள்பட பலர் கலந்துகொண்டனர்.