பணியின்போது மரணம் அடைந்த போலீசாருக்கு அஞ்சலி

ராணிப்பேட்டையில் பணியின்போது மரணமடைந்த போலீசாருக்கு நடந்த வீரவணக்கநாளில், போலீஸ் சூப்பிரண்டு தீபா சத்யன் மலர்வளையம் வைத்து அஞ்சலி செலுத்தினார்.

வீரவணக்க நாள்

ஒவ்வொரு வருடமும் அக்டோபர் மாதம் 21-ந் தேதி, பணியின்போது மரணம் அடைந்த போலீசாருக்கு அஞ்சலி செலுத்தும் வீரவணக்க நாள்கடைபிடிக்கப்பட்டு வருகிறது. அதன்படி ராணிப்பேட்டையில் உள்ள ஆயுதப்படை வளாகத்தில் நேற்று காவலர் வீரவணக்க நாள் அனுசரிக்கப்பட்டது.

இதனை முன்னிட்டு நேற்று காலை நடைபெற்ற நிகழ்ச்சியில் ராணிப்பேட்டை மாவட்ட போலீஸ் சூப்பிரண்டு தீபா சத்யன், உயிர் நீத்த போலீசாருக்கு மலர் வளையம் வைத்து அஞ்சலி செலுத்தினார்.

60 குண்டுகள் முழங்க

இதனைத் தொடர்ந்து உதவி போலீஸ் சூப்பிரண்டு யாதவ் கிரிஷ் அசோக், கூடுதல் போலீஸ் சூப்பிரண்டுகள் விஸ்வேஸ்வரய்யா, முத்து கருப்பன், துணை போலீஸ் சூப்பிரண்டு பிரபு, இன்ஸ்பெக்டர்கள் பார்த்தசாரதி, மங்கையர்கரசி மற்றும் சப்- இன்ஸ்பெக்டர்கள், போலீசார், உயிர் நீத்த போலீசாரின் குடும்பத்தினர் ஆகியோர் அஞ்சலி செலுத்தினர்.

60 குண்டுகள் முழங்க அஞ்சலி செலுத்தப்பட்டது. நிகழ்ச்சியில் ராணிப்பேட்டை மாவட்டத்தில் உள்ள போலீசார் கலந்து கொண்டனர்.