திண்டுக்கல், பழனியில் 5 மையங்களில் தட்டச்சு தேர்வு

தமிழக அரசு பணிகளில் சேருபவர்கள் தமிழ், ஆங்கிலத்தில் தட்டச்சு செய்யும் திறன் பெற்றிருப்பது கூடுதல் தகுதியாக கருதப்படுகிறது. இதனால் போட்டி தேர்வுக்கு தயாராகுபவர்களில் பெரும்பாலானோர் தற்போது தட்டச்சு பயிற்சி மையங்களுக்கு சென்று தட்டச்சு பயிற்சி பெற்று வருகின்றனர். தமிழகத்தில் சுமார் 1 லட்சத்து 74 ஆயிரத்து 527 பேர் தட்டச்சு பயிற்சி பெறுகின்றனர். இவ்வாறு தட்டச்சு பயிற்சி பெறுபவர்களுக்கு ஆண்டு தோறும் பிப்ரவரி, ஆகஸ்டு மாதங்களில் தேர்வு நடத்தப்படும். அதன்படி தமிழகம் முழுவதும் தட்டச்சு தேர்வு நேற்று நடந்தது.

திண்டுக்கல் மாவட்டத்தில் திண்டுக்கல் ஆர்.வி.எஸ். பாலிடெக்னிக் கல்லூரி, எஸ்.பி.எம். பாலிடெக்னிக் கல்லூரி, ஏ.பி.சி. பாலிடெக்னிக் கல்லூரி, புனித ஜோசப் பாலிடெக்னிக் கல்லூரி ஆகிய இடங்களில் 4 தேர்வு மையங்களும், பழனியில் ஒரு தேர்வு மையமும் தட்டச்சு தேர்வுக்காக அமைக்கப்பட்டிருந்தது. இந்த தேர்வை எழுதுவதற்காக மாவட்டம் முழுவதும் 4 ஆயிரத்து 353 பேர் விண்ணப்பித்து இருந்தனர். அவர்கள் அனைவரும் நேற்று தேர்வு எழுதினர். மாவட்டத்தில் 5 மையங்களிலும் அந்தந்த கல்லூரி முதல்வர் மேற்பார்வையில் இந்த தேர்வு நடந்தது. மாவட்டம் முழுவதும் இன்றும் (ஞாயிற்றுக்கிழமை) தட்டச்சு தேர்வு நடக்கிறது. மேலும் தட்டச்சு தேர்வு முடித்தவர்களுக்கு கணினியை கையாளும் திறன் தொடர்பான தேர்வு (சி.ஓ.ஏ.) அடுத்த மாதம் 4-ந்தேதி தொடங்கி 3 நாட்கள் நடக்கிறது.