சென்னையில் இன்று நடைபெறுகிறது 'வள்ளலார்-200' ஓராண்டு நிறைவு விழா: முதல்-அமைச்சர் பங்கேற்பு

சென்னை,

முதல்-அமைச்சர் மு.க.ஸ்டாலின் தலைமையில் சென்னை, கலைவாணர் அரங்கில் இன்று (வியாழக்கிழமை) மாலையில் "வள்ளலார்-200" ஓராண்டு தொடர் அறநிகழ்வின் நிறைவு விழா நடைபெறுகிறது. இவ்விழாவில், 52 வாரங்கள் முப்பெரும் விழாவை சிறப்பாக ஏற்பாடு செய்து நடத்தியமைக்காக சிறப்பு குழுவின் தலைவர் மற்றும் உறுப்பினர்களுக்கு முதல்-அமைச்சர் மு.க.ஸ்டாலின் சிறப்பு செய்து பேசுகிறார். அதனைத் தொடர்ந்து வள்ளலார் சிறப்பு புகைப்பட கண்காட்சியினையும், அன்னதானத்தையும் தொடங்கிவைக்க உள்ளார்.

"வள்ளலார்-200"-ன் முதல் நிகழ்ச்சியாக, 5.10.2022 அன்று முதல்-அமைச்சர் மு.க.ஸ்டாலின் சென்னை, ராஜா அண்ணாமலைபுரம், கபாலீசுவரர் கற்பகாம்பாள் திருமண மண்டபத்தில், வள்ளலார் முப்பெரும் விழாவை தொடங்கி வைக்கும் வகையில், "வள்ளலார்-200" முப்பெரும் விழா இலச்சினை, தபால் உறை மற்றும் சிறப்பு மலர் ஆகியவற்றை வெளியிட்டு, 52 வாரங்களுக்கான விழாக்களில் முதல் வார நிகழ்ச்சிகளையும், ஆண்டு முழுவதும் அன்னதானம் வழங்கும் நிகழ்வையும் தொடங்கிவைத்தார்.

வடலூரிலும் நடைபெறுகிறது

"வள்ளலார்-200" ஓராண்டு தொடர் அறநிகழ்வின் நிறைவு விழா சென்னையிலும், வடலூரிலும் இன்று (வியாழக்கிழமை) நடைபெறுகிறது. சென்னையில் முதல்-அமைச்சர் மு.க.ஸ்டாலின் தலைமையில் நடைபெறும் விழாவில் அமைச்சர்கள், திருவாவடுதுறை ஆதீனம் அம்பலவாண தேசிகர், குன்றக்குடி ஆதீனம் பொன்னம்பல அடிகளார், பேரூர் ஆதீனம் மருதாச்சல அடிகளார், சிரவை ஆதீனம் குமரகுருபர சுவாமிகள், மயிலம் பொம்மபுர ஆதீனம் சிவஞானபாலய தேசிகர், வேளாக்குறிச்சி ஆதீனம் சத்திய ஞான மகாதேவ் சுவாமிகள், சூரியனார் கோவில் ஆதீனம் மகாலிங்க தேசிகர், பெருநகர சென்னை மாநகராட்சி மேயர் பிரியா, எம்.பி., எம்.எல்.ஏ.க்கள் மற்றும் அரசு உயர் அதிகாரிகள் கலந்து கொண்டு சிறப்பிக்க உள்ளனர்.

இவ்வாறு அதில் கூறப்பட்டுள்ளது.