பயணிகள் நிழற்குடை சீரமைக்கக்கோரி கிராமமக்கள் சாலை மறியல்

வந்தவாசி

வந்தவாசி அருகே பயணிகள் நிழற்குடை சீரமைக்கக்கோரி கிராமமக்கள் சாலை மறியலில் ஈடுபட்டனர்.

பயணிகள் நிழற்குடை

வந்தவாசி அருகே காவினியாத்தூர் கிராமத்திற்கு செல்லும் கூட்டுச்சாலையில் பயணிகள் நிழற்குடை இடிந்து தரைமட்டமானது.

பயணிகள் நிழற்குடை இல்லாததால் மழை நேரங்களிலும், வெயில் காலங்களிலும் பொதுமக்கள் பெரும் சிரமப்பட்டு வருகின்றனர்.

இந்த நிலையில் பயணிகள் நிழற்குடை கட்டி தர வேண்டும் என்று பலமுறை ஊராட்சி மன்ற தலைவர் மற்றும் வட்டார வளர்ச்சி அலுவலகத்தில் புகார் மனு அளித்தும் எந்தவித நடவடிக்கையும் எடுக்கவில்லை என்று கூறப்படுகிறது.

இதனால் ஆத்திரமடைந்த கிராம மக்கள் வந்தவாசி- ஒரத்தி சாலையில் மறியல் போராட்டத்தில் ஈடுபட்டனர்.

முற்றுகை

அப்போது அந்த வழியாக தி.மு.க. மாவட்ட பொறுப்பாளர் தரணிவேந்தன் வந்தார். அவரை பொதுமக்கள் முற்றுகையிட்டு பயணிகள் நிழற்குடை கட்டித் தர வேண்டும் என்று முறையிட்டனர்.

இதையடுத்து பயணிகள் நிழற்குடை கட்டித் தரப்படும் என்று அவர் பொதுமக்களிடம் உறுதி அளித்தார். இதையடுத்து கிராம மக்கள் சாலை மறியலை கைவிட்டனர்.

இதனால் வந்தவாசி- ஒரத்தி சாலையில் சுமார் ஒரு மணி நேரம் போக்குவரத்து பாதிக்கப்பட்டது.

இந்த சம்பவத்தால் அந்த பகுதியில் பரபரப்பு ஏற்பட்டது.