விருத்தாசலம்விருத்தாம்பிகை அம்மன் ஆடிப்பூர திருக்கல்யாண விழாகொடியேற்றத்துடன் நாளை தொடங்குகிறது

விருத்தாசலம்,

விருத்தாசலத்தில் பிரசித்திபெற்ற பாலாம்பிகை, விருத்தாம்பிகை உடனுறை விருத்தகிரீஸ்வரர் கோவில் அமைந்துள்ளது. இந்த கோவிலில் விருத்தாம்பிகை அம்மன் தனி சன்னதியில் காட்சி அளிக்கிறார். அம்மனுக்கு ஆண்டுதோறும் ஆடி மாதத்தில் ஆடிப்பூர திருக்கல்யாண விழா விமரிசையாக நடைபெறுவது வழக்கம்.

அதன்படி இந்த ஆண்டிற்கான திருக்கல்யாண விழா நாளை(வியாழக்கிழமை) காலை 9 மணிக்கு அம்மன் சன்னதியில் கொடியேற்றத்துடன் தொடங்குகிறது. இந்த விழா வருகிற 23-ந் தேதி வரை 11 நாட்கள் நடக்கிறது. தினந்தோறும் காலை மற்றும் இரவு நேரங்களில் சுவாமி வீதி உலா நடைபெறுகிறது.

23-ந் தேதி திருக்கல்யாணம்

விழாவின் முக்கிய நிகழ்ச்சியாக 21-ந் தேதி தேரோட்டமும், 22-ந் தேதி ஸ்படிக பல்லக்கும் நடைபெறுகிறது. விழாவின் சிகர நிகழ்ச்சியாக வருகிற 23-ந் தேதி அதிகாலை 5.30 மணிக்கு விருத்தாம்பிகை, பாலாம்பிகை உடனுறை விருத்தகிரீஸ்வரருக்கு, திருமாங்கல்யதாரணம் என்ற ஆடிப்பூர திருக்கல்யாணம் நடைபெற உள்ளது. விழாவிற்கான ஏற்பாடுகளை இந்து சமய அறநிலையத்துறை உதவி ஆணையர் சந்திரன், செயல் அலுவலர் மாலா மற்றும் விழாக்குழுவினர் செய்து வருகின்றனர்.