வரைவு வாக்குச்சாவடி பட்டியல் இன்று வெளியீடு

திருப்பூர்,

திருப்பூர் மாவட்டத்தில் காலியாக உள்ள ஊரக உள்ளாட்சி பதவியிடங்களை நிரப்பும் வகையில் வரைவு வாக்குச்சாவடி பட்டியல் கலெக்டர் அலுவலகத்தில் இன்று (வியாழக்கிழமை) வெளியிடப்படுகிறது.

பதவியிடங்கள் காலி

திருப்பூர் மாவட்டத்தில் கடந்த ஏப்ரல் மாதம் 30-ந் தேதி வரை ராஜினாமா, இறப்பு போன்ற பல்வேறு காரணங்களால் ஊரக உள்ளாட்சி பதவியிடங்களில் ஏற்பட்டுள்ள காலியிடங்களை நிரப்ப உரிய நடவடிக்கை மேற்கொள்ள தமிழ்நாடு மாநில தேர்தல் ஆணையத்தால் தெரிவிக்கப்பட்டுள்ளது. திருப்பூர் மாவட்டத்தில் 2 ஊராட்சி ஒன்றிய வார்டு உறுப்பினர், ஒரு கிராம ஊராட்சி தலைவர் மற்றும் 5 கிராம ஊராட்சி வார்டு உறுப்பினர் பதவியிடங்கள் காலியாக உள்ளன.

அதன்படி அவினாசி ஒன்றியத்தில் ஊராட்சி ஒன்றிய 16-வது வார்டு உறுப்பினர், பல்லடம் ஒன்றியத்தில் ஊராட்சி ஒன்றிய 1-வது வார்டு உறுப்பினர் பதவியிடம் காலியாக உள்ளன. இதுபோல் ஊத்துக்குளி ஊராட்சி ஒன்றியம் இச்சிப்பாளையம் ஊராட்சி தலைவர் பதவியிடம் காலியாக உள்ளன.

வரைவு வாக்குச்சாவடி பட்டியல்

அதுபோல் அவினாசி ஒன்றியத்தில் அய்யம்பாளையம் ஊராட்சி 6-வது வார்டு உறுப்பினர், குடிமங்கலம் ஒன்றியம் குடிமங்கலம் ஊராட்சி 1-வது வார்டு உறுப்பினர், காங்கயம் ஒன்றியம் ஆலாம்பாடி ஊராட்சி 9-வது வார்டு உறுப்பினர், பொங்கலூர் ஒன்றியம் வடக்கு அவினாசிபாளையம் ஊராட்சி 7-வது வார்டு உறுப்பினர், உடுமலை ஒன்றியம் அந்தியூர் ஊராட்சி 2-வது வார்டு உறுப்பினர் பதவியிடம் காலியாக உள்ளன.

ஊரக உள்ளாட்சி தற்செயல் தேர்தல்கள் தொடர்பாக வரைவு வாக்குச்சாவடி பட்டியல் இன்று (வியாழக்கிழமை) மதியம் 3 மணிக்கு திருப்பூர் மாவட்ட கலெக்டர் அலுவலகத்தில் கலெக்டர் தலைமையில் வெளியிடப்பட உள்ளது. வரைவு வாக்குச்சாவடி பட்டியலில் ஏதும் மாற்றங்கள், மறுப்புகள், கோரிக்கைகள் இருந்தால் அதுதொடர்பாக நடைபெறும் கலந்தாலோசனைக்கூட்டத்தில் அரசியல் கட்சிகள், பொதுமக்கள் தங்களது கருத்துகள், மறுப்புகளை தெரிவிக்கலாம்.

இந்த தகவலை திருப்பூர் மாவட்ட கலெக்டர் வினீத் தெரிவித்துள்ளார்.