ஊட்டியில் சுற்றுச்சூழலை பாதுகாக்க வாக்கத்தான் விழிப்புணர்வு நிகழ்ச்சி-2000 பேர் பங்கேற்பு

ஊட்டி

நீலகிரி சுற்றுச்சூழல் குறித்து விழிப்புணர்வு ஏற்படுத்தும் விதமாக ஊட்டியில் வாக்கத்தான்- 2023 என்ற தலைப்பில் விழிப்புணர்வு நிகழ்ச்சி நடந்தது.

வாக்கத்தான்- 2023

நீலகிரி மாவட்டம் ஊட்டி உருவாகி 200 ஆண்டுகள் ஆனதையொட்டி பல்வேறு கொண்டாட்டங்கள் நடைபெற்று வருகிறது. இதற்காக தமிழக அரசு ரூ.10 கோடி சிறப்பு நிதி ஒதுக்கி உள்ளது.

இந்த நிலையில் நீலகிரியின் சுற்றுச்சூழல் குறித்து விழிப்புணர்வு ஏற்படுத்தும் விதமாக " (Enchanting Nilgiris - Walkathon) வாக்கத்தான் 2023" என்ற தலைப்பில் மாபெரும் விழிப்புணர்வு பேரணி நேற்று ஊட்டியில் நடந்தது. பேரணியை மாவட்ட கலெக்டர் அம்ரித், அமைச்சர் ராமச்சந்திரன் ஆகியோர் தொடங்கி வைத்தனர்.

இந்தப் பேரணியானது வென்லாக் டவுன், பிங்கர் போஸ்ட், தமிழகம் சாலை, கில் பங்க், ஸ்டீபன் தேவாலயம், சேரிங் கிளாஸ் வழியாக எச்.ஏ.டி.பி. மைதானத்தை அடைந்தது.

2000 பேர் பங்கேற்பு

இந்த பேரணியில் சமூக ஆர்வலர்கள் சுற்றுச்சூழல் ஆர்வலர்கள், வணிகச் சங்கங்களின் பிரதிநிதிகள், ஓட்டல் சங்கங்களின் பிரதிநிதிகள், அரசு சாரா நிறுவனங்களின் பிரதிநிதிகள், பல்வேறு அரசுத்துறை ஊழியர்கள், பள்ளி-கல்லூரி மாணவ- மாணவிகள், சுற்றுலாப் பயணிகள் மற்றும் பொதுமக்கள் என சுமார் 2000 பேர் கலந்து கொண்டனர்.

இதில் கலந்து கொண்டவர்கள் சுற்றுச்சூழலை வலியுறுத்தும் வாசகங்கள் அடங்கிய டி-ஷர்ட் அணிந்திருந்தனர் மேலும் வனவிலங்குகள் பாதுகாப்பு, சுற்றுச்சூழல் பாதுகாப்பு உள்ளிட்ட பதாகைகளை கையில் ஏந்தியவாறு கோஷம் எழுப்பியபடி சென்றனர்.

இதில் கலந்து கொண்டவர்களுக்கு பங்கேற்பை பாராட்டி இ-மெயில் முகவரிக்கு பங்கேற்புச் சான்றிதழ் அனுப்பப்பட்டது.

சுற்றுச்சூழல் விழிப்புணர்வு நிகழ்ச்சியில்

பிளாஸ்டிக் பொருட்கள் பயன்பாடு

சுற்றுச்சூழல் விழிப்புணர்வுக்காக நடத்தப்பட்ட வாக்கத்தான் நிகழ்ச்சியில் பிளாஸ்டிக் குழாய்கள் மற்றும் பிளாஸ்டிக் அடங்கிய மற்ற பொருள்கள் மூலம் விழிப்புணர்வு பதாகைகள் செய்யப்பட்ட சம்பவம் சுற்றுச்சூழல் ஆர்வலர்களை கடும் அதிர்ச்சியில் ஆழ்த்தியது. இதேபோல் காலை 7.45 மணிக்கு வாக்கத்தான் விழிப்புணர்வு நிகழ்ச்சி தொடங்கும் என்று அறிவித்துவிட்டு காலை 9 மணிக்கு நிகழ்ச்சி தொடங்கப்பட்டது. இதனால் அங்கு வந்திருந்த பள்ளி, கல்லூரி மாணவ -மாணவிகள் பசியால் சிரமம் அடைந்தனர். இறுதியில் 10 மணிக்கு பின்னர் அவர்களுக்கு சிறிய பாக்கெட்டில் இருக்கும் ஆவின் ஜூஸ், லட்டு, மிக்சர் வழங்கப்பட்டது. அந்த ஆவின் ஜூஸ் பாக்கெட்டிலும் பிளாஸ்டிக் உறிஞ்சி குழல் இருந்தது குறிப்பிடத்தக்கது.