மோட்டார்சைக்கிளில் இருந்து தவறி விழுந்து காவலாளி பலி

பரமத்திவேலூர்:

பரமத்தி பாவடி தெருவை சேர்ந்தவர் சின்னப்பன் (வயது 48). கரூரில் உள்ள ஒரு தனியார் கம்பெனியில் காவலாளியாக வேலை பார்த்து வந்தார். இவர் நேற்று முன்தினம் கரூருக்கு வேலைக்கு சென்று விட்டு மீண்டும் பரமத்தி நோக்கி தனது மோட்டார் சைக்கிளில் சென்று கொண்டிருந்தார். அப்போது வேலூரில் இருந்து பரமத்தி செல்லும் சாலையில் உள்ள ஒரு திருமண மண்டபம் அருகே சென்றபோது, திடீரென மோட்டார் சைக்கிளில் இருந்து நிலைதடுமாறி சின்னப்பன் கீழே விழுந்தார். இதை பார்த்த அந்த வழியாக வந்தவர்கள் சின்னப்பனை மீட்டு பரமத்திவேலூரில் உள்ள அரசு மருத்துவமனைக்கு அனுப்பி வைத்தனர். பின்னர் மேல்சிகிச்சைக்காக சேலம் அரசு மருத்துவமனைக்கு அனுப்பி வைக்கப்பட்டார். ஆனால் அங்கு சிகிச்சை பலனின்றி நேற்று அதிகாலை சின்னப்பன் இறந்தார். இதுகுறித்து பரமத்திவேலூர் போலீசார் வழக்குப்பதிவு செய்து விசாரணை நடத்தி வருகின்றனர்.