தாழ்வாக செல்லும் மின்கம்பிகள் சீரமைக்கப்படுமா?

வாழ்மங்கலத்தில் தாழ்வாக செல்லும் மின்கம்பிகள் சீரமைக்கப்படுமா? என விவசாயிகள் எதிர்பார்த்து உள்ளனர்.

ஆபத்தான மின்கம்பிகள்

நாகை மாவட்டம் திருமருகல் ஒன்றியம் அகரக்கொந்தகை ஊராட்சி வாழ்மங்கலத்தில் சாலையோரமாகவும், வயல் வெளிகள் நடுவிலும் மின்கம்பங்கள் அமைக்கப்பட்டு வாழ்மங்கலம், பூலாப்பள்ளம் பகுதியில் உள்ள மேல்நிலை நீர் தேக்க தொட்டிக்கு நீர் ஏற்றும் மோட்டார் இயக்கும் அறைக்கு மின் வினியோகம் செய்யப்பட்டு வருகிறது.

இந்த நிலையில் இப்பகுதியில் உள்ள மின் கம்பிகள் தாழ்வாக செல்கிறது. ஆபத்தான நிலையில் இந்த பகுதியில் மின்கம்பிகள் தாழ்வாக செல்வதால் விவசாய பணிகளுக்கு டிராக்டர் உள்ளிட்ட வாகனங்களை கொண்டு செல்ல முடியாமல் விவசாயிகள் அவதிக்கு உள்ளாகின்றனர். மேலும் குறுவை சாகுபடி செய்துள்ள விவசாயிகள் அறுவடை எந்திரங்களை வயலுக்கு கொண்டு செல்ல முடியாமல் குறுவை நெற்பயிர்கள் வீணாகும் நிலை ஏற்பட்டுள்ளது.

நடவடிக்கை

இது குறித்து சம்பந்தப்பட்ட துறை அதிகாரிகளிடம் பலமுறை கோரிக்கை விடுத்தும் இதுவரை எந்தவித நடவடிக்கையும் எடுக்கப்படவில்லை என விவசாயிகள் வேதனை தெரிவிக்கிறார்கள்.

எனவே தாழ்வாக செல்லும் மின் கம்பிகளை சீரமைக்க வேண்டும் என அந்த பகுதியை சேர்ந்த விவசாயிகள் கோரிக்கை விடுத்து விடுத்துள்ளனர்.