பெண் அடித்துக்கொலை

தேன்கனிக்கோட்டை

தளி அருகே தோட்டத்தில் அவரைக்காய் பறித்ததில் ஏற்பட்ட தகராறில், கட்டையால் அடித்து பெண் கொலை செய்யப்பட்டார். இதுதொடர்பாக கொழுந்தனை போலீசார் கைது செய்தனர்.

அண்ணியிடம் தகராறு

கிருஷ்ணகிரி மாவட்டம் தளி அருகே உள்ள கும்ளாபுரத்தை சேர்ந்தவர் பில்லப்பா (வயது 50). இவரது மனைவி முனிரத்தினம்மா (45). விவசாயி. இவர் நேற்று காலை அந்த பகுதியில் உள்ள தனது விவசாய நிலத்தில் அவரைக்காய் பறித்துக் கொண்டு இருந்தார்.

அப்போது பில்லப்பாவின் தம்பி மட்டப்பா என்கிற கோபாலப்பா (45) என்பவர் அங்கு வந்தார். அவர் தோட்டத்தில் அவரைக்காய் பறிக்க கூடாது என்று ஏற்கனவே கூறி உள்ளேன். நீ எப்படி அவரைக்காய் பறிக்கலாம் என்றுக் கூறி தனது அண்ணியிடம் தகராறு செய்தார். இதுதொடர்பாக அவர்கள் 2 பேருக்கும் இடையே வாக்குவாதம் ஏற்பட்டது.

அடித்துக்கொலை

இதில் ஆத்திரம் அடைந்த கோபாலப்பா அங்கிருந்த கட்டையால் அண்ணி முனிரத்தினம்மாவை சரமாரியாக தாக்கினார். இதில் பலத்த காயம் அடைந்த அவர் சம்பவ இடத்திலேயே ரத்த வெள்ளத்தில் துடிதுடித்து இறந்தார். இதற்கிடையில் முனிரத்தினம்மாவின் அலறல் சத்தம் கேட்டு அக்கம் பக்கத்தினர் விரைந்து வந்தனர்.

இதனால் கோபாலப்பா அங்கிருந்து தப்பி ஓடி விட்டார். இந்த கொலை குறித்து அக்கம் பக்கத்தினர் தளி போலீஸ் நிலையத்திற்கு தகவல் தெரிவித்தனர். அதன் பேரில் போலீசார் சம்பவ இடத்திற்கு விரைந்து வந்தனர். அவர்கள் கொலை செய்யப்பட்ட முனிரத்தினம்மாவின் உடலை மீட்டு பிரேத பரிசோதனைக்காக தேன்கனிக்கோட்டை அரசு ஆஸ்பத்திரிக்கு அனுப்பி வைத்தனர்.

கைது

இதைத்தொடர்ந்து விவசாய நிலத்தில் பதுங்கி இருந்த கோபாலப்பாவை போலீசார் பிடித்து விசாரணை நடத்தினர். அப்போது அவரது மனைவி கடந்த சில ஆண்டுகளுக்கு முன்பு பிரிந்து சென்று விட்டதும், இதனால் கோபாலப்பா மனநலம் பாதிக்கப்பட்டு கிராமத்தில் சுற்றி வந்ததும் தெரியவந்தது.

மேலும் இவர் அந்த பகுதி மக்களிடமும் அடிக்கடி தகராறு செய்து வந்ததும், நேற்று அவரைக்காய் பறித்தது தொடர்பாக முனிரத்தினம்மாவிடம் தகராறு செய்து அவரை கட்டையால் அடித்துக்கொலை செய்ததும் விசாரணையில் தெரியவந்தது. இதையடுத்து இந்த கொலை தொடர்பாக போலீசார் வழக்குப்பதிந்து கோபாலப்பாவை கைது ெசய்து தொடர்ந்து விசாரணை நடத்தி வருகிறார்கள்.

தளி அருகே தோட்டத்தில் அவரைக்காய் பறித்த தகராறில், அண்ணியை கொழுந்தனே கட்டையால் அடித்துக் கொலை செய்த சம்பவம் அந்த பகுதியில் பரபரப்பை ஏற்படுத்தி உள்ளது.