மோட்டார் சைக்கிளில் இருந்து தவறி விழுந்த பெண் பலி

துக்க நிகழ்ச்சிக்கு...

புதுக்கோட்டை மாவட்டம், திருமயம் தேவாப்பட்டியை சேர்ந்தவர் ரெங்கசாமி. இவரது மனைவி வெள்ளையம்மாள் (வயது 53). இவர் தனது மகன் மணிகண்டனுடன் தேவாபட்டியில் இருந்து அன்னவாசல் அருகே உள்ள உறவினரின் வீட்டு துக்க நிகழ்ச்சிக்கு மோட்டார் சைக்கிளில் சென்று விட்டு வீட்டிற்கு திரும்பி வந்து கொண்டிருந்தார். மோட்டார் சைக்கிளை மணிகண்டன் ஓட்டினார். பரம்பூர் அருகே புல்வயல் ஆண்டி ஊரணி என்னும் இடத்தில் வந்தபோது எதிர்பாராதவிதமாக மோட்டார் சைக்கிளில் இருந்து வெள்ளையம்மாள் கீழே தவறி விழுந்ததாக கூறப்படுகிறது.

பெண் பலி

இதில் படுகாயமடைந்த அவரை அருகில் இருந்தவர்கள் மீட்டு சிகிச்சைக்காக புதுக்கோட்டை அரசு மருத்துவக்கல்லூரி மருத்துவமனைக்கு அனுப்பி வைத்தனர். அங்கு அவரை பரிசோதனை செய்த டாக்டர்கள் அவர் ஏற்கனவே இறந்து விட்டதாக தெரிவித்தனர். இதுகுறித்து அன்னவாசல் போலீசார் வழக்குப்பதிவு செய்து விசாரணை நடத்தி வருகின்றனர். உறவினர் வீட்டு துக்க நிகழ்ச்சிக்கு சென்று திரும்பிய போது மோட்டார் சைக்கிளில் இருந்து தவறி விழுந்து பெண் பலியான சம்பவம் அப்பகுதியில் சோகத்தை ஏற்படுத்தியுள்ளது.