ஓடும் ரெயிலில் இருந்து தவறி விழுந்து பெண் பலி

குடியாத்தத்தை அடுத்த லத்தேரி- காவனூர் ரெயில் நிலையங்களுக்கு இடையே ஜோலார்பேட்டையில் இருந்து காட்பாடி நோக்கி சென்ற ஏதோ ஒரு ரெயிலில் பயணம் செய்த சுமார் 30 வயது மதிக்கத்தக்க பெண் தவறி விழுந்து அடிபட்டு சம்பவம் இடத்திலேயே பரிதாபமாக உயிரிழந்தார். இது குறித்து தகவல் அறிந்ததும் ஜோலார்பேட்டை ரெயில்வே போலீஸ் சப்- இன்ஸ்பெக்டர் சுப்பிரமணி மற்றும் போலீசார் வழக்குப் பதிவு செய்து பிணத்தை கைப்பற்றி பிரேத பரிசோதனைக்காக குடியாத்தம் அரசு மருத்துவமனைக்கு அனுப்பி வைத்தனர்.

இறந்தவர் யார்?, எந்த ஊரைச் சேர்ந்தவர் என்பது தெரியவில்லை. அவர் வைத்து இருந்த செல்போன் சேதமடைந்த நிலையில் உள்ளதால் அடையாளம் காண முடியவில்லை. இது சம்பந்தமாக போலீசார் விசாரணை நடத்தி வருகின்றனர்.