மோட்டார் சைக்கிள் விபத்தில் பெண் பலி

திண்டிவனம்,

திண்டிவனம் அடுத்த காட்டு சிவிரி கிராமத்தை சேர்ந்தவர் முருகையன். இவரது மனைவி அனுசுயா (வயது 39). இவர்களுக்கு சூர்யா(19) என்ற மகன் உள்ளார். முருகையன் தற்போது சென்னை மடிப்பாக்கத்தில் குடும்பத்துடன் வசித்து வருகிறார். இந்நிலையில் அனுசுயா தனது மகனுடன் மோட்டார் சைக்களில் சென்னையில் இருந்து நடுவனந்தல் கிராமத்திற்கு புறப்பட்டார். பின்னர், அங்கிருந்து சென்னைக்கு திரும்பினார். அப்போது திண்டிவனம் அடுத்த ஓங்கூர் அருகே சென்ற போது எதிர்பாராதவிதமாக மோட்டார் சைக்கிள் சாலையோரத்தில் இருந்த இரும்பு தடுப்பு கட்டையில் மோதியது. இந்த விபத்தில் பலத்த காயமடைந்த அனுசுயா சம்பவ இடத்திலேயே பரிதாபமாக இறந்தார். காயமடைந்த சூர்யா சிகிச்சைக்காக திண்டிவனம் அரசு மருத்துவமனையில் அனுமதிக்கப்பட்டுள்ளார். இந்த விபத்து குறித்த புகாரின் பேரில் ஒலக்கூர் போலீசார் வழக்குப்பதிவு செய்து விசாரணை நடத்தி வருகின்றனர்.