மோட்டார் சைக்கிள் மீது கார் மோதி இளம்பெண் பலி

வடமதுரை அருகே பாண்டியனூர் பகுதியை சேர்ந்தவர் போதும்பொண்ணு (வயது 23). இவர் கடந்த 3-ந்தேதி தனது உறவினர் மாரியப்பன் என்பவருடன் மோட்டார் சைக்கிளில் குரும்பபட்டி சாலையில் சென்று கொண்டிருந்தார்.

புளியம்பட்டியில் உள்ள தண்ணீர் தொட்டி அருகே அவர்கள் வந்தபோது, பின்னால் வந்த கார் ஒன்று மோட்டார் சைக்கிள் மீது பயங்கரமாக மோதியது. இதில் தூக்கிவீசப்பட்ட போதும்பொண்ணு, மாரியப்பன் படுகாயமடைந்தனர். பின்னர் அவர்களை அக்கம்பக்கத்தினர் மீட்டு சிகிச்சைக்காக திண்டுக்கல்லில் உள்ள தனியார் மருத்துவமனையில் சேர்த்தனர்.

அங்கிருந்து போதும்பொண்ணு மேல் சிகிச்சைக்காக மதுரை அரசு மருத்துவமனையில் அனுமதிக்கப்பட்டார். ஆனால் அங்கு சிகிச்சை பலனளிக்காமல் போதும்பொண்ணு பரிதாபமாக இறந்தார். இதுகுறித்து வடமதுரை போலீசார் வழக்குப்பதிவு செய்து விசாரணை நடத்தி வருகின்றனர்.