கல்லூரி மாணவரை தாக்கிய வாலிபர் கைது

திருவண்ணாமலை மாவட்டம் செய்யாறு டவுன் கிரிதரன்பேட்டை செல்வ விநாயகர் கோயில் தெருவை சேர்ந்த வேலாயுதம் என்பவரின் மகன் கிஷோர்குமார் (வயது 20). இவர், செய்யாறு அறிஞர் அண்ணா அரசு கலைக்கல்லூரி 3-ம் ஆண்டு படித்து வருகிறார்.

இந்த நிலையில் அதே பகுதியை சேர்ந்த செல்வம் மகன் ரஞ்சித் (26) என்பவர் கிஷோர்குமாரின் நண்பர் சல்மானிடம் தகராறு செய்துள்ளார். இதனை பார்த்த கிஷோர்குமார் தகராறை தடுத்து போது, ஆத்திரம் அடைந்த ரஞ்சித், கிஷோர்குமாரை ஆபாசமாக பேசி உருட்டு கட்டையால் தாக்கி, கொலை மிரட்டல் விடுத்ததாக கூறப்படுகிறது.

இதுகுறித்த புகாரின் பேரில் செய்யாறு போலீஸ் சப்-இன்ஸ்பெக்டர் மோகன் வழக்குப்பதிவு செய்து ரஞ்சித்தை கைது செய்து விசாரணை நடத்தி வருகிறார்.