மோட்டார் சைக்கிள் திருடிய வாலிபர் கைது

பாளையங்கோட்டை கே.டி.சி. நகரைச் சேர்ந்தவர் தர்மராஜ். இவருடைய மகன் ராஜாராம் (வயது 32). பிளம்பரான இவர் கடந்த மாதம் மோட்டார் சைக்கிளை தனது வீட்டின் முன்பு நிறுத்தி இருந்தார். இதனை நோட்டமிட்ட மர்மநபர், நைசாக மோட்டார் சைக்கிளை திருடிச்சென்றார். இதுகுறித்த புகாரின்பேரில், பாளையங்கோட்டை தாலுகா போலீஸ் சப்-இன்ஸ்பெக்டர் சங்கரநாராயணன் வழக்குப்பதிவு செய்து விசாரணை நடத்தினார்.

இந்த நிலையில் நெல்லையில் உள்ள ஒரு மோட்டார் சைக்கிள் பழுது பார்க்கும் கடையில் வாலிபர் ஒருவர் மோட்டார் சைக்கிளை விற்க வந்தார். இதுகுறித்து தகவல் அறிந்த போலீசார் சம்பவ இடத்துக்கு சென்று விசாரணை நடத்தினர். விசாரணையில் அவர் தூத்துக்குடி அருகே உள்ள முள்ளக்காட்டை சேர்ந்த திருமால் மகன் சாரதி (23) என்பதும், அவர் ராஜாராம் மோட்டார் சைக்கிளை திருடி விற்பனை செய்ய வந்ததும் தெரியவந்தது. இதையடுத்து போலீசார் வழக்குப்பதிவு செய்து அவரை கைது செய்தனர்.