நீரேற்று நிலையத்தில் ஒயர் திருடிய வாலிபர் கைது

நெல்லை அருகே கருப்பந்துறை செல்லும் வழியில் குறுக்குத்துறையில் நீரேற்று நிலையம் உள்ளது. இந்த நீரேற்று நிலையத்தில் இருந்த காப்பர் ஒயரை நேற்று முன்தினம் மர்மநபர் ஒருவர் திருடிச்சென்றார். அப்போது அங்கு வந்த பம்பு ஆபரேட்டர் அருண் உள்ளிட்டவர்கள் அந்த நபரை பிடித்து நெல்லை சந்திப்பு போலீஸ் நிலையத்தில் ஒப்படைத்தனர். போலீசார் விசாரணையில் அவர் குறுக்குத்துறையை சேர்ந்த எடிசன் மகன் ரீகன் (வயது 29) என்பது தெரியவந்தது. இதனையடுத்து போலீசார் அவரை கைது செய்தனர். அவரிடம் இருந்து காப்பர் ஒயர் பறிமுதல் செய்யப்பட்டது.