குண்டர் சட்டத்தில் வாலிபர் கைது

சேலம்,

சேலம் அழகாபுரம் பெரியபுதூர் பகுதியை சேர்ந்தவர் ஜீவா (வயது 24). இவர் கடந்த 12-ந் தேதி அவரது பாட்டி ஜெயலட்சுமியை தாக்கியதுடன் கத்தியை காட்டி பணம் கேட்டு மிரட்டினார். இதுதொடர்பாக அழகாபுரம் போலீசார் வழக்குப்பதிவு செய்து ஜீவாவை கைது செய்தனர். போலீஸ் விசாரணையில் ஏற்கனவே அவர் மீது அழகாபுரம் போலீஸ் நிலையத்தில் 2 வழக்குகள் பதிவாகி இருந்தது தெரியவந்தது.

எனவே பொதுமக்களுக்கு இடையூறு விளைவிக்கும் வகையில் தொடர்ந்து குற்றச்செயல்களில் ஈடுபட்டு வரும் ஜீவாவை குண்டர் தடுப்பு சட்டத்தில் கைது செய்ய போலீஸ் துணை கமிஷனர் மாடசாமி மாநகர போலீஸ் கமிஷனருக்கு பரிந்துரை செய்தார். இதை பரிசீலித்து ஜீவாவை குண்டர் தடுப்பு சட்டத்தில் கைது செய்து போலீஸ் கமிஷனர் நஜ்முல் ஹோடா உத்தரவிட்டார். இதற்கான ஆணை சிறையில் உள்ள அவரிடம் வழங்கப்பட்டது.