கொடுத்த கடனை திருப்பிக்கேட்டு வேளாண்மை அதிகாரி காரில் கடத்தல் வாலிபர் கைது

களக்காடு:

நெல்லை அருகே உள்ள பாலாமடை மேலத்தெருவை சேர்ந்தவர் நடராஜன் மகன் சண்முகசிகா (வயது 43). இவர் களக்காடு யூனியன் அலுவலக வளாகத்தில் உள்ள வேளாண்மை அலுவலகத்தில் வேளாண்மை அதிகாரியாக பணிபுரிந்து வருகிறார். கடந்த ஒரு ஆண்டுக்கு முன்பு சண்முகசிகா, நெல்லை தச்சநல்லூர் அருகே உள்ள மேலகரையை சேர்ந்த இசக்கியம்மாள் என்பவரிடம் ரூ.2 லட்சத்து 30 ஆயிரம் கடன் வாங்கியதாகவும், அந்த கடனை அவர் திருப்பிக் கொடுக்கவில்லை எனவும் கூறப்படுகிறது.

இந்நிலையில் நேற்று முன்தினம் களக்காடு வேளாண்மை அலுவலகத்தில் நடந்த ஆய்வு கூட்டத்தில் சண்முகசிகா கலந்து கொண்டார். உணவு இடைவேளையின்போது அலுவலகத்தை விட்டு வெளியே வந்த சண்முகசிகாவை, இசக்கியம்மாளின் மகனான அம்பை ரகுமான் தெருவை சேர்ந்த சுரேஷ்குமார் (36), அவரது நண்பர் விக்னேஷ் ஆகியோர் காரில் ஏறுமாறு கட்டாயப்படுத்தினர்.

அப்போது அவர் ஏற மறுத்தார். எனினும் அவரை மிரட்டி காரில் ஏற்றி மேலகரைக்கு கடத்திச் சென்றனர். அங்கு பணத்தை திருப்பித் தராவிட்டால் கொலை செய்து விடுவோம் என்று கத்திமுனையில் மிரட்டினர். பின்னர் அவரை விடுவித்தனர். இதுபற்றி அவர் களக்காடு போலீசில் புகார் செய்தார். போலீசார் வழக்குப்பதிவு செய்து விசாரணை நடத்தி சுரேஷ்குமாரை கைது செய்தனர். அவரது நண்பர் விக்னேசை தேடி வருகின்றனர்.