குஜராத் அணிக்கு எதிராக அதிர்ச்சி தோல்வி...! எப்படி நடந்தது என்று எனக்கு தெரியவில்லை.... கே..எல்.ராகுல் பேட்டி

லக்னோ,

16-வது ஐ.பி.எல். 20 ஓவர் கிரிக்கெட் திருவிழா இந்தியாவின் பல்வேறு நகரங்களில் நடந்து வருகிறது. இதில் இன்று நடைபெற்ற ஆட்டத்தில் கே.எல்.ராகுல் தலைமயிலான லக்னோவும் , ஹர்திக் பாண்டியா தலைமயிலான குஜராத் அணியும் மோதின

டாஸ் வென்று முதலில் பேட்டிங் செய்த குஜராத் அணி 20 ஓவர்கள் முடிவில் 6விக்கெட் இழப்பிற்கு 135ரன்கள் எடுத்தது . குஜராத் அணியில் ஹர்திக் பாண்டியா 66 ரன்கள் குவித்தார்.லக்னோ சார்பில் குருனால் பாண்டியா , ஸ்டாய்னிஸ் தலா 2 விக்கெட் வீழ்த்தினர்.

தொடர்ந்து 136 ரன்களுடன் லக்னோ விளையாடியது.தொடக்க வீரர்களாக கே.எல்.ராகுல் , கைல் மேயர்ஸ் களமிறங்கினர். தொடக்கம் முதல் இருவரும் அதிரடி காட்டினர். சிறப்பாக ஆடி தொடக்க விக்கெட்டுக்கு 55 ரன்கள் சேர்த்த நிலையில் மேயர்ஸ் 24 ரன்களில் ரஷீத் கான் பந்துவீச்சில் ஆட்டமிழந்தார்.

அடுத்து வந்த குருனல் பாண்டியா 23 ரன்கள் எடுத்த நிலையில் வெளியேறினார். நிலைத்து ஆடிய கே.எல்.ராகுல் அரைசதம் அடித்தார்.ஒரு கட்டத்தில் லக்னோ அணி வெற்றி வாய்ப்பு அதிகம் இருந்தது.கடைசி 4 ஓவரில் 27 ரன்கள் மட்டும் தேவைப்பட்டது, அப்போது லக்னோ அணிக்கு 8 விக்கெட்டுகள் மீதம் இருந்தது.

தொடர்ந்து பூரன் 1 ரன்களில் வெளியேறினார். குஜராத் சிறப்பாக பந்துவீசிய நிலையில் கடைசி ஓவரில் 12 ரன்கள் தேவைப்பட்டது. அந்த ஓவரை குஜராத் அணியின் மோஹித் சர்மா வீசினார். கே.எல். ராகுல் மற்றும் படோனி களத்தில் இருந்தனர். முதல் பந்தில் 2 ரன் எடுத்த ராகுல் அடுத்த பந்தில் , 61 பந்துகளில் 68 ரன்களுடன் ஆட்டமிழந்தார்.

அடுத்து ஸ்டாய்னிஸ் கேட்ச் முறையில் ஆட்டமிழந்தார். அடுத்து படோனி , ஹூடா , இருவரும் அடுத்தடுத்து ரன் அவுட் ஆனார். இறுதில் 20 ஓவர்கள் முடிவில் 7விக்கெட் இழப்பிற்கு 128ரன்கள் எடுத்து லக்னோ அணி தோல்வி அடைந்தது. இதனால் குஜராத் அணி அபார வெற்றி பெற்றது.

இந்த நிலையில் இந்த தோல்விக்கு பிறகு பேசிய லக்னோ கேப்டன் கே.எல்.ராகுல் கூறியதாவது ,

இது எப்படி நடந்தது என்று தெரியவில்லை, மிக வேகமாக நடந்து விட்டது. ,"நாங்கள் பந்துவீச்சிலும் களத்திலும் மிகவும் சிறப்பாக செயல்பட்டோம் . நாங்கள் நிலைமைகளை நன்றாகப் பயன்படுத்தினோம். நாங்கள் பேட்டிங்கிலும் நன்றாகத் தொடங்கினோம். என்ன நடந்தது என்று என்னால் இன்னும் சொல்ல முடியவில்லை.

"இறுதியில் இது ஒரு போட்டி , நாங்கள் இன்னும் 7 போட்டிகளில் 4 வெற்றிகளை பெற்றுள்ளோம் என தெரிவித்தார்.