கடையம் அருகே கிணற்றில் குதித்து அரசு ஆசிரியை தற்கொலை

கடையம், 

தென்காசி மாவட்டம் கடையம் அருகே உள்ள வள்ளியம்மாள்புரம் மேலத்தெருவை சேர்ந்தவர் செல்வராஜ். இவர் அங்குள்ள ஒரு பள்ளியில் சத்துணவு அமைப்பாளராக பணியாற்றி வருகிறார். இவருடைய மனைவி சுந்தரவள்ளி (வயது 52). இவர் தீர்த்தாரப்புரத்தில் உள்ள அரசு தொடக்கப்பள்ளியில் ஆசிரியையாக பணியாற்றி வந்தார். இவர்களுக்கு 2 மகன்கள் உள்ளனர்.

நேற்று காலையில் சுந்தரவள்ளி பள்ளிக்கு செல்வதாக வீட்டில் கூறி சென்றார். ஆனால் அவர் மாலையில் வெகுநேரம் ஆகியும் வீடு திரும்பவில்லை.

இதனால் அவருடைய உறவினர்கள் பள்ளிக்கு சென்று விசாரித்தனர். அப்போது அவர் பள்ளிக்கு செல்லவில்லை என்பது தெரியவந்தது. இதையடுத்து சுந்தரவள்ளியை பல்வேறு இடங்களில் தேடினர்.அப்போது வீட்டுக்கு அருகே உள்ள கிணற்றில் சுந்தரவள்ளி பிணமாக மிதந்தது தெரியவந்தது.

இதுகுறித்து உடனடியாக கடையம் போலீசாருக்கு தகவல் தெரிவிக்கப்பட்டது. உடனே போலீசார் சம்பவ இடத்துக்கு விரைந்து வந்து, சுந்தரவள்ளியின் உடலை கைப்பற்றி விசாரணை நடத்தினர். விசாரணையில், சுந்தரவள்ளி கடந்த 3 மாதங்களாக குடல் நோயால் அவதிப்பட்டு வந்ததாகவும், இதனால் மனம் உடைந்த அவர் கிணற்றில் குதித்து தற்கொலை செய்து கொண்டதும் தெரியவந்தது.

இதையடுத்து சுந்தரவள்ளியின் உடல் பிரேத பரிசோதனைக்காக தென்காசி அரசு ஆஸ்பத்திரிக்கு அனுப்பி வைக்கப்பட்டது. இதுகுறித்து கடையம் போலீசார் வழக்குப்பதிவு செய்து விசாரணை நடத்தி வருகின்றனர். கிணற்றில் குதித்து அரசு பள்ளி ஆசிரியை தற்கொலை செய்து கொண்ட சம்பவம் அந்த பகுதியில் பெரும் சோகத்தை ஏற்படுத்தியது.