டி.கே. சிவக்குமார் முதல்-மந்திரியாக ஆதரவு தர தயார்; குமாரசாமி பேட்டி

பெங்களூரு,

கர்நாடகாவில் சட்டசபை தேர்தலில் மெஜாரிட்டியுடன் வெற்றி பெற்று காங்கிரஸ் கட்சி ஆட்சியமைத்துள்ளது. எனினும், முதல்-மந்திரியாக வருவதில் சித்தராமையா மற்றும் டி.கே. சிவக்குமார் இடையே போட்டி காணப்பட்டது.

இதற்காக இரு தலைவர்களும் டெல்லியில் முகாமிட்டனர். கட்சியின் உயர்மட்ட தலைவர்களை அடுத்தடுத்து சந்தித்தனர். இதன்பின் கட்சி மேலிட முடிவின்படி, கர்நாடக முதல்-மந்திரியாக சித்தராமையா பதவி வகிக்கிறார். துணை முதல்-மந்திரியாக டி.கே. சிவக்குமார் உள்ளார்.

இந்நிலையில், முன்னாள் முதல்-மந்திரி மற்றும் மதசார்பற்ற ஜனதா தளத்தின் தலைவரான குமாரசாமி பெங்களூருவில் செய்தியாளர்களிடம் பேசும்போது, துணை முதல்-மந்திரி டி.கே. சிவக்குமார், முதல்-மந்திரியாவதற்கு விரும்பினால், எங்களுடைய எம்.எல்.ஏ.க்களின் ஆதரவையும் கணக்கில் எடுத்து கொள்ளலாம் என்று கூறினார்.

எனினும் அவர், காங்கிரசில் உள்ள நிலைமையை பார்க்கும்போது, அக்கட்சியில் எத்தனை பேர் முதல்-மந்திரியாவதற்கு விருப்பத்துடன் உள்ளனர் என்பது பற்றி எனக்கு தெரியாது என்றும் கூறினார்.

கர்நாடகாவில், மதசார்பற்ற ஜனதா தளத்தில் இருந்து எம்.எல்.ஏ.க்கள் பலர் காங்கிரசில் இணைவதற்கு தயாராக உள்ளனர் என பல்வேறு காங்கிரஸ் தலைவர்கள் கூறி வந்த நிலையில் குமாரசாமி இதனை கூறியுள்ளார்.