ஜூன் 2-வது வாரத்தில் தமிழக சட்டசபை கூட்டத்தொடர்...?

சென்னை,

நாடு முழுவதும் நாடாளுமன்ற தேர்தல் 7 கட்டங்களாக நடைபெற்று வருகிறது. முதற்கட்ட தேர்தல் கடந்த 19-ம் தேதியும், 2-ம் கட்ட தேர்தல் கடந்த 26-ம் தேதியும் நடைபெற்றது. இதையடுத்து, வரும் 7, 13, 20,25 ஆகிய தேதிகளில் அடுத்தடுத்த கட்ட தேர்தல் நடைபெற உள்ளது. ஜூன் 1-ம் தேதி கடைசி கட்டமான 7ம் கட்ட தேர்தல் நடைபெற உள்ளது. தேர்தலில் பதிவாகும் வாக்குகள் ஜூன் 4-ம் தேதி எண்ணப்பட்டு அன்றே முடிவுகள் அறிவிக்கப்பட உள்ளன.

இந்த நிலையில், நாடாளுமன்ற தேர்தல் முடிவுகள் வெளியானதும் ஜூன் 2-வது வாரத்தில் சட்டசபை கூட்டத்தொடர் கூட வாய்ப்பு உள்ளதாக தகவல்கள் வெளியாகியுள்ளன. கூட்டத்தொடரில் துறை ரீதியான மானிய கோரிக்கைகள் மீது விவாதங்கள் நடைபெறும் என கூறப்படுகிறது.

சபாநாயகர் தலைமையில் அலுவல் ஆய்வுக்குழு ஜூன் 2-வது வாரம் கூடி கூட்டத்தொடரை எத்தனை நாட்கள் நடத்துவது என்பது குறித்து முடிவு செய்யப்பட உள்ளது. ஜூன் 2-வது வாரத்தில் தொடங்கும் சட்டசபை கூட்டத்தொடர் சுமார் 25 நாட்களுக்கு மேல் நடைபெறும் என எதிர்பார்க்கப்படுகிறது.