இங்கிலாந்துக்கு எதிராக புதிய சாதனை படைத்த இந்திய கேப்டன் சுப்மன் கில்

பர்மிங்காம்,

இந்திய கிரிக்கெட் அணி இங்கிலாந்தில் சுற்றுப்பயணம் மேற்கொண்டு 5 போட்டிகள் கொண்ட டெஸ்ட் தொடரில் பங்கேற்றுள்ளது. இதில் லீட்சில் நடந்த முதலாவது டெஸ்டில் இங்கிலாந்து வெற்றி பெற்று தொடரில் 1-0 என்ற கணக்கில் முன்னிலை வகிக்கிறது.

இந்த நிலையில் இவ்விரு அணிகள் இடையிலான 2-வது டெஸ்ட் போட்டி பர்மிங்காமில் நேற்று தொடங்கியது. 'டாஸ்' ஜெயித்த இங்கிலாந்து கேப்டன் பென் ஸ்டோக்ஸ் முதலில் இந்தியாவை பேட் செய்ய அழைத்தார்.

இதையடுத்து யஷஸ்வி ஜெய்ஸ்வாலும், லோகேஷ் ராகுலும் இந்தியாவின் இன்னிங்சை தொடங்கினர். நிதானமாக ஆடிய இந்த ஜோடி 9-வது ஓவரில் பிரிந்தது. லோகேஷ் ராகுல் (2 ரன், 26 பந்து), கிறிஸ் வோக்ஸ் வீசிய பந்தை தடுத்து ஆடிய போது அது பேட்டின் உள்பகுதியில் பட்டு ஸ்டம்பையும் பதம் பார்த்தது.

2-வது விக்கெட்டுக்கு கருண் நாயர் இறங்கினார். அவரும், ஜெய்ஸ்வாலும் அணியை சரிவில் இருந்து படிப்படியாக மீட்டனர். ஸ்கோர் 95 ஆக உயர்ந்த போது, கருண் நாயர் (31 ரன், 50 பந்து, 5 பவுண்டரி) பிரைடன் கார்ஸ் வீசிய ஷாட்பிட்ச் பந்தில் ஆட்டமிழந்தார். அடுத்து கேப்டன் சுப்மன் கில் வந்தார். மறுமுனையில் சதத்தை நோக்கி முன்னேறிய ஜெய்ஸ்வால் (87 ரன், 107 பந்து, 13 பவுண்டரி) தேவையில்லாமல் வைடாக சென்ற பந்தை அடிக்க முற்பட்டு விக்கெட் கீப்பர் ஜாமி சுமித்திடம் சிக்கினார்.

இதன் பின்னர் விக்கெட் கீப்பர் ரிஷப் பண்ட் கால்பதித்தார். கடந்த டெஸ்டில் இரு இன்னிங்சிலும் சதம் அடித்து பிரமாதப்படுத்திய பண்ட் இந்த முறை அதிக நேரம் நிலைக்கவில்லை. அவர் 25 ரன்னில், சுழற்பந்து வீச்சாளர் சோயிப் பஷீர் ஓவரில் பந்தை தூக்கியடித்து கேட்ச் ஆனார். தொடர்ந்து இறங்கிய நிதிஷ்குமார் ரெட்டி (1 ரன்) பந்து வெளியே போவதாக நினைத்து பேட்டை உயர்த்த, போல்டாகி மிரண்டு போனார். இதனால் இந்தியா தடுமாற்றத்திற்குள்ளானது.

இந்த சூழலில் 6-வது விக்கெட்டுக்கு சுப்மன் கில்லுடன், ஆல்-ரவுண்டர் ரவீந்திர ஜடேஜா கைகோர்த்தார். இருவரும் மேற்கொண்டு விக்கெட் விழாமல் பார்த்துக் கொண்டதுடன் அணியை திடமான நிலைக்கு நகர்த்தினர். அபாரமாக ஆடிய சுப்மன் கில் டெஸ்டில் தனது 7-வது சதத்தை நிறைவு செய்தார்.

சுப்மன் கில் சாதனை

இங்கிலாந்து தொடரில் இருந்து இந்திய அணியின் டெஸ்ட் கேப்டன்ஷிப்பை ஏற்றுள்ள சுப்மன் முதல் இரு டெஸ்டிலும் சதம் விளாசியுள்ளார். இதன் மூலம் கேப்டனாக முதல் இரு டெஸ்டிலும் சதம் அடித்த 4-வது இந்தியர் என்ற சிறப்பை பெற்றார். ஏற்கனவே விஜய் ஹசாரே, சுனில் கவாஸ்கர், விராட் கோலி ஆகிய இந்தியர்கள் இத்தகைய சாதனையை படைத்துள்ளனர்.

இங்கிலாந்து மண்ணில் அடுத்தடுத்து இரு டெஸ்டுகளில் சதம் அடித்த 2-வது இந்திய கேப்டன் என்ற பெருமையையும் (முதலில் முகமது அசாருதீன்) கில் பெற்றார்.

ரோகித் சர்மா ஓய்வுக்கு பிறகு இந்திய டெஸ்ட் அணியின் கேப்டனாக பொறுப்பு ஏற்ற முதல் 2 டெஸ்ட் போட்டிகளிலேயே சதம் விளாசி அசத்திய இந்திய கேப்டன் கில்லுக்கு பல்வேறு தரப்பினர் பாராட்டுகளை தெரிவித்து வருகின்றனர்.

SENA (தென்ஆப்பிரிக்கா, இங்கிலாந்து, நியூசிலாந்து மற்றும் ஆஸ்திரேலியா) நாடுகளுடன் இதற்கு முன் விளையாடிய 29 இன்னிங்ஸ்களில் ஒரு சதம் அடிக்காத கில், கேப்டனாக விளையாடிய மூன்றே இன்னிங்ஸ்களில் 2 சதங்களை விளாசி அசத்தி உள்ளார். 

இன்று 2-வது நாள் ஆட்டம்

ஆட்ட நேர முடிவில் இந்திய அணி முதல் இன்னிங்சில் 85 ஓவர்களில் 5 விக்கெட்டுக்கு 310 ரன்கள் சேர்த்துள்ளது. கேப்டன் சுப்மன் கில் 114 ரன்களுடனும் (216 பந்து, 12 பவுண்டரி), ஜடேஜா 41 ரன்களுடனும் (67 பந்து, 5 பவுண்டரி) களத்தில் இருக்கிறார்கள்.

இங்கிலாந்து தரப்பில் கிறிஸ்வோக்ஸ் 2 விக்கெட்டும், ஸ்டோக்ஸ், பிரைடன் கார்ஸ், பஷீர் தலா ஒரு விக்கெட்டும் எடுத்தனர்.

இன்று 2-வது நாள் ஆட்டம் நடைபெறுகிறது.